ಕವಿತೆ

ಇವರಿಂದ
ಮತ್ತೆ ಮಗುವಾಗಬೇಕು

ಹೊರಗೆ ನಿರಾಭರಣ ಬಯಲಿತ್ತು
ಒಳಗೆ ಚಳಿಯ ಕನಲಿತ್ತು
ಕದಡಿದ ಕಾವಳಕ್ಕಂಜದೇ
ಬಾನಿಗಂಟಿದ್ದ ನಕ್ಷತ್ರಗಳೆಡೆಗೆ
ಬೊಟ್ಟು ತೋರಿಸಿ
ಮಗ್ಗಿ ಹೇಳಿದವಳು ನೀನು
ತಾರೆಗಳ ಊರಿನಿಂದ
ಹೊರಟ ಚೆಂಬೆಳಕು ನಿನ್ನ
ಕೋಣೆಗುಂಟ ನಿಲುಕಲಿಲ್ಲ.


ಬೆಣ್ಣೆಯಂಥ ಕೈಯ ತುಂಬ
ಮದರಂಗಿಯ ಚುಕ್ಕೆ ಇಟ್ಟು
ರಾಣಿಯ ಕಥೆ ಬಿಚ್ಚಿದವಳು
ಬೇರು ಬಿಡುವ ಬಣ್ಣದ ಕೆಳಗೆ
ನಾಳೆಗಳ ಗಂಟು ಕಟ್ಟಿದವಳು
ಹರಡಿಕೊಂಡ ಕನಸ ರಾಶಿ
ನಿನ್ನ ಬೆರಳ ತುದಿಯಲ್ಲಿ
ಜೀವನ್ಮುಖಿಯಾಗಲಿಲ್ಲ.

ಸುಕ್ಕುಗಟ್ಟಿದ ಹಾಳೆಯ ತುಂಬ
ಊರ ತೇರಿನ ಚಿತ್ರ ಬಿಡಿಸಿ
ನನ್ನ ಪೋಕರಿ ಕಣ್ಣುಗಳಲ್ಲಿ
ಹಬ್ಬದ ಬಾಷ್ಯ ಬರೆದವಳು
ನಿನ್ನ ಕಣ್ಣಂಚಿನಲ್ಲಿ ಹೊರಟ
ಸಂಕಟಗಳ ಮೆರವಣಿಗೆಗೆ
ಮತಾಪುಗಳ ಸ್ವಾಗತವಿರಲಿಲ್ಲ

ಹಿತ್ತಿಲ ಬಿದಿರ ಕಡ್ಡಿಗಳನ್ನು ಪೋಣಿಸಿ
ಆಕಾಶಬುಟ್ಟಿ ಕಟ್ಟಿ
ನನ್ನ ಕಣ್ಣಲ್ಲಿ ದೀಪಗಳ
ತೊಟ್ಟಿಲು ಕಟ್ಟಿದವಳು ನೀನು
ಹೊಸಮಳೆ ಬಿದ್ದ ನೆಲದಲ್ಲಿ
ಕವಿತಿದ್ದ ಹಳೆ ಗರುಕೆಯ ಬುಡದಲ್ಲಿ
ಜೀವರಸದ ಆಸೆ ಕಂಡವಳು
ನೀನು ಹರಿಸಿದ ಬೆವರ ಹನಿಗಳು
ಜೀವಸೆಲೆಯಾಗಲಿಲ್ಲ

ಹರಿಯುವ ತೊರೆಯ ತಟದಲ್ಲಿ
ಅರಳಿದ ಕೇದಗೆ ನೀನು
ಹೂವಿನೆಸಳಿನ ಗಂಧ ನೀನು
ನಿನ್ನ ಅಂತರಂಗದ ಕಂಪಿನಲ್ಲಿ
ನಾನು ಮತ್ತೆ ಮಗುವಾಗಬೇಕು
ಅಳಸಿ ಹೋದ ಚಿತ್ರಗಳಿಗೆಲ್ಲ
ಜೀವ ತುಂಬಬೇಕು.




ಕಡಲ ಹುಡುಗಿಯ ನೆನಪು





















ನರನಾಡಿಯಲ್ಲೆಲ್ಲ ಸುಡುಮದ್ದು
ತುಂಬಿಕೊಂಡ, ಪ್ರೀತಿ ಗೊತ್ತಿಲ್ಲದೆ
ಅವುಡುಗಚ್ಚಿ ಕುಳಿತ ನಗರದಲ್ಲಿ
ನನ್ನೂರ ಕಡಲ ಹುಡುಗಿ ಚಿರಯೌವನೆ

ಕದನದಂಥ ಕಡಲ ಮುಂದೆ
ಕೃಷ್ಣ ಸುಂದರಿ ಅಂತರ್ಮುಖಿ
ಮೌನವೇ ಮತಾಪು
ಕಿಬ್ಬೊಟ್ಟೆಗೆ ಒದ್ದು
ಮಾತಾಗುತ್ತವೆ ಅವಳೊಡಲ ಬೇನೆ

ಎರಡಕ್ಷರ ಕಲಿಯದವಳು
ಭಾರವನ್ನೆಲ್ಲ ಎದೆಯೊಳಗಿಟ್ಟು
ಸೆರಗ ಬಿಗಿದೆತ್ತಿ ಕಟ್ಟಿ
ಕಡಲ ಹೂಗಳ ಹೊತ್ತು
ದಂಡೇರಿ ಬರುವ ನಾಯಕಿ

ರಕ್ತ ಮಾಂಸಗಳ ಮಾರ್ಕೆಟ್ಟಲ್ಲಿ
ಮಾತು ಯುದ್ಧವಾಗಿ
ಹಸಿಬಿಸಿ ಕನಸುಗಳು
ಗಿರಕಿ ಹೊಡೆಯುತ್ತವೆ
ಪ್ರೀತಿ ಕೊಂದು ಮಾತಾಡದ
ಕಡಲ ಹುಡುಗಿ
ಪ್ರಶ್ನೆಗಳಿಗೆ ಕ್ರಯಕಟ್ಟದ ಜೀವಿ

ಮದಿರೆ ಹೀರಿ ನಂಜೇರಿದ
ಈ ನಗರದ ಹುಡುಗರು
ಇವಕ್ಕೆಲ್ಲಿ ಅರ್ಥವಾಗುತ್ತದೆ
ನನ್ನೂರ ಕಡಲು
ಅವಳ ಕಣ್ಣ ಉಗ್ರಾಣದೊಳಗೆ
ಗೂಡು ಕಟ್ಟಿದ ನೋವು




ಬಂದುಬಿಡು ಮಳೆಗಾಲದ ಸಂಜೆಗೆ

ಅಂಥದೊಂದು ಮಳೆಗಾಲದ ಸಂಜೆ
ಮತ್ತೇರಿದ ಮುಗಿಲಿನ ಕಪ್ಪು ಕರಗಿ
ನಿನ್ನ ಕಣ್ಣ ಕೆಳಗಿನ ಕಾಡಿಗೆಯಾಗಿತ್ತು
ರೆಪ್ಪೆ ಅದುರಿ ಬಿದ್ದ ಪ್ರತಿ ಹನಿಯೂ
ಮುಂಗಾರಿನ ಗಿಲಕಿ ಹಾಡಿತ್ತು

ನೆಲದ ಬದುವಿನ ಕಂಕುಳಲ್ಲಿ
ಒಸರಿದ ಸೆಲೆಗಳ ನೆನೆಯುತ್ತ
ಪಾರಿಜಾತ ಗಿಡದ ಕೆಳಗೆ
ಗಲ್ಲೆನ್ನಲಿಲ್ಲ ಹಸಿರ ಬಳೆ
ತೋಳಬಂಧಿಯಲ್ಲಿ
ಶಿಲೆಯಾಯ್ತು ಒನಪಿನ ದೇಹ

ಕೆಂಪು ಚುಕ್ಕಿಗಳ ದಾವಣಿಯ
ಅಂಚು ಸವರಿ ಕಾವಾರಿದ
ಮಣ್ಣೊಳಗೆ ಇಳಿದಂತೆ ಮಳೆ
ನಿನ್ನೊಳಗೆ ಹುಚ್ಚು ಕುದುರೆಯಾಗಿತ್ತು
ಕೆಂಡದಂಥ ಆಸೆ
ನಾಭಿಯನ್ನೆಲ್ಲ ತಡಕಾಡಿ
ಧ್ಯಾನಸ್ಥನಂತೆ ಸೋಗು ಹಾಕಿತ್ತು

ಮಳೆಯೆಂದರೆ ಹೀಗೆ
ತೆನೆ ಅರಳಿದ ಮೋಡದ ಕಂಪು
ಅದರೊಳಗೆ ಮಿಂದ ನೀನು
ಗಂಧವತಿಯಾದ ಕನಸು

ಮೊದಲ ಮಳೆ ಬಿದ್ದು ಹೋದ ಮೇಲೆ
ಉಳಿದದ್ದು ಮೌನವೋ? ಸದ್ದೋ?
ಉಸಿರಿಗೆ ಉಸಿರೇ ನಿಂತು
ಮೊಳಕೆ ಒಡೆದಿದ್ದು
ಹಸಿನೆಲದೊಡಲಿನ ದಾವಂತವೋ?

ಇಂಥದೊಂದು ಮಳೆಗಾಲದ ಸಂಜೆಗಾಗಿ
ಎಷ್ಟೊಂದು ವರ್ಷ ಕಾದಿದ್ದೇನೆ
ಮೋಡ ಕಟ್ಟಿತ್ತು, ಗಾಳಿ ಬೀಸಿತ್ತು
ನಿನ್ನಂತೆ ತೊಯ್ದು ನಿಂತಿದೆ
ಪಾರಿಜಾತದ ಗಿಡ
ಬೆಟ್ಟದ ತಪ್ಪಲಿನ ಕೆಳಗೆ
ಬಿಸಿಯುಸಿರಿಗೆ ಕಾದು
ಶಿಲೆಯಾಗಿದ್ದೇನೆ ನಾನು

ಈಗ ಮತ್ತೆ ಬಿಚ್ಚಿಕೊಂಡಿದೆ
ಮೋಡದ ಸೆರಗು
ಎದೆಯ ಉಬ್ಬಿನೊಳಗೆ ಉಳಿದ
ಅಷ್ಟೂ ಹನಿಗಳು
ಕರಗಲಿ ನಿನ್ನ ಬೊಗಸೆಯೊಳಗೆ
ಬಂದು ಬಿಡು ಇನ್ನೊಮ್ಮೆ
ಮಳೆಗಾಲದ ಸಂಜೆಗೆ

ಕಾಮೆಂಟ್‌ಗಳು

ಕಾಮೆಂಟ್‌‌ ಪೋಸ್ಟ್‌ ಮಾಡಿ

ಈ ಬ್ಲಾಗ್‌ನ ಜನಪ್ರಿಯ ಪೋಸ್ಟ್‌ಗಳು

ಬದುಕು ಗೆಲ್ಲಿಸುವ ಸಿಮರೂಬ....

ಇವರಿಂದ
ಇಮೇಜ್
ಧರೆಗಿಳಿದ ಸ್ವರ್ಗಸೀಮೆಯ ಸಸ್ಯ....  ಕ್ಯಾನ್ಸರ್ ಮುಕ್ತ ನಾಡು ಕಟ್ಟುವ-ಡಾ.ಜೋಷಿ ದಂಪತಿ ಕನಸು  ಆತನ ಹೆಸರು ನಚಿಕೇತ್. ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜಿನಲ್ಲಿ ಪಿಯುಸಿಗೆ ಸೇರ್ಪಡೆಯಾಗಿದ್ದ. ಆಗ ಆತನಿಗೆ ಕಾಣಿಸಿಕೊಂಡಿದ್ದು ಮಾರಕ ಕಾಯಿಲೆ. `ಇದು ಬ್ಲಡ್ ಕ್ಯಾನ್ಸರ್, ತಕ್ಷಣ ಚಿಕಿತ್ಸೆ ಆರಂಭಿಸಿ' ಎಂದು ವೈದ್ಯರು ಸಲಹೆ ಮಾಡುತ್ತಾರೆ. ಕುಟುಂಬ ಕಣ್ಣೀರಾಗುತ್ತದೆ, ಬೆಳೆದು ನಿಂತ ಮಗನ ಭವಿಷ್ಯವೇ ಮುಗಿದು ಹೋದಂತೆ ಕುಸಿದು ಕುಳಿತು ಬಿಡುತ್ತದೆ. ಧೃತಿಗೆಡದ ಅಪ್ಪ-ಅಮ್ಮ ಮೊದಲ ಕಿಮೋಥೆರಪಿಯನ್ನೂ ಮಾಡಿಸುತ್ತಾರೆ. ಆ ಸಮಯದಲ್ಲೇ ಅವರಿಗೆ ಸಿಕ್ಕ ಮಾಹಿತಿ-ಸಿಮರೂಬಚಿಕಿತ್ಸೆ. ಬೇರೇನನ್ನೂ ಯೋಚಿಸದೇ ಚಿಕಿತ್ಸೆ ಶುರು ಮಾಡಿಕೊಳ್ಳುತ್ತಾರೆ. ಆರು ತಿಂಗಳು ನಿರಂತರ ಚಿಕಿತ್ಸೆ. ಬಳಿಕ ಕ್ಲಿನಿಕಲ್ ಟೆಸ್ಟ್; ಕ್ಯಾನ್ಸರ್ ಇರುವ ಸಣ್ಣ ಕುರುಹೂ ಕಾಣಿಸುವುದಿಲ್ಲ! ಸಿಮರೂಬ ಗಿಡ (ಲಕ್ಷ್ಮೀತರು)ದೊಂದಿಗೆ ಡಾ. ಜೋಷಿ ದಂಪತಿ   ಆಕೆಯ ಹೆಸರು ಸುಲೇಖಾ. ಇಬ್ಬರು ಮಕ್ಕಳ ತಾಯಿ. ಆಕೆಗೆ ಕಾಣಿಸಿಕೊಂಡಿದ್ದು ಮೆಲನೋಮಾ. ಇದೊಂದು ಚರ್ಮರೋಗ. ಕ್ಯಾನ್ಸರ್ ನಲ್ಲಿಯೇ ಅತ್ಯಂತ ಮಾರಕವಿದು ಎನ್ನುತ್ತಾರೆ ವೈದ್ಯರು. ಸುಲೇಖಾ ಪತ್ನಿಗೆ ತಜ್ಞ ವೈದ್ಯರು ಹೇಳಿದ್ದು ಇಷ್ಟು; ಬದುಕಿದ್ದರೆ ಮೂರು ಅಥವಾ ನಾಲ್ಕು ತಿಂಗಳು ಮಾತ್ರ! ಆದರೆ ಕಿದ್ವಾಯಿ ಆಸ್ಪತ್ರೆಯ ಹಿರಿಯ ವೈದ್ಯರಾದ ಡಾ.ವಿಜಯಲಕ್ಷ್ಮೀ ದೇಶಮಾನೆ ಅವರು ಸುಲೇಖಾಗೆ ಮಾಡಿದ ಸಲಹೆ- ಸಿಮರೂಬ...
ಇನ್ನಷ್ಟು ಓದಿ

ಶತಮಾನಗಳಿಂದ ಕನ್ನಡ ತಾಯಿಗೆ ಪೂಜೆ ಸಲ್ಲಿಸುತ್ತಿರುವ ಪ್ರಕೃತಿ-ಇದೇ ನಿತ್ಯೋತ್ಸವ...!

ಇವರಿಂದ
ಇಮೇಜ್
ಕವಿಯಾದವನ ಎದೆಯಲ್ಲಿ ಒಂದು ಕಿಡಿಯಿರುತ್ತದೆ. ನಮಗೆ ಗೋವಿನ ಹಾಡು ಕೇಳಿದಾಕ್ಷಣ ಕಣ್ಣಲ್ಲಿ ನೀರು ಬಂದುಬಿಡುತ್ತದೆ, ಯಾಕೆ ಹೇಳಿ? ಅದು ನಮ್ಮ ಹೃದಯವನ್ನು ಕಲುಕುತ್ತದೆ. ಕಲಕದ ಸಂವೇದನೆ, ಕಾಡದೇ ಇರುವಂತಾದ್ದು ಸಾಹಿತ್ಯ ಅಲ್ಲ. ಇವತ್ತು ಬಂದು ಮಳೆ ಹಾತೆಗಳ ರೀತಿಯಲ್ಲಿ ಮಾಯವಾಗಿ ಹೋಗಬಾರದು. ಸಾಹಿತ್ಯ ಜನಗಳ ನಡುವೆ ರಸಸೇತುವೆಗಳನ್ನು ಕಟ್ಟಬೇಕು. ಎದೆಯೊಳಗಿನ ಕಿಡಿಯನ್ನು ಕೆಂಡವಾಗಿ ಮಾಡುವುದು ಹೇಗೆ ಎಂದು ಹೇಳಿದ್ದಾರೆ ಸಿರಿ ಬೆಳಕಿನ ಕವಿ ನಿಸಾರ್ ಅಹಮದ್.  (2018ರ ಅಕ್ಟೋಬರ್ ತಿಂಗಳ ಕೊನೆಯ ಭಾಗದಲ್ಲಿ ಓ ಮನಸೇ ಪತ್ರಿಕೆಗಾಗಿ ನಡೆಸಿದ್ದ ಸಂದರ್ಶನದ ಪೂರ್ಣಪಾಠ ಇಲ್ಲಿದೆ... ) ನಿಮ್ಮ ಮೊದಲ ಕವಿತೆ ಹುಟ್ಟಿದ ಕ್ಷಣ ಮತ್ತು ಅದರಿಂದ ನಿಮಗಾದ ಖುಷಿ 1949ರಲ್ಲಿ ನಾನು ಹೊಸಕೋಟೆಯ ಮುನ್ಸಿಪಲ್ ಹೈಸ್ಕೂಲ್ನಲ್ಲಿ ಓದ್ತಾ ಇದ್ದಾಗ ಈ ಪಠ್ಯ ಪುಸ್ತಕಗಳಲ್ಲಿದ್ದ ಕುವೆಂಪು, ಪಂಜೆ ಮಂಗೇಶ್ ರಾಯರು, ಬೇಂದ್ರೆ ಅವರ ಪದ್ಯಗಳನ್ನು ಅನುಸರಿಸಿ ಬರೆಯಬೇಕು ಎಂಬ ಆಸೆ ಹುಟ್ಟಿಕೊಂಡಿತು. ಆ ಹೊತ್ತಿನಲ್ಲಿ ನಾವೆಲ್ಲ ಸೇರಿ ವನಸುಮ ಅಂತ ಒಂದು ಕೈಬರಹದ ಪತ್ರಿಕೆ ತಂದ್ವಿ. ಅದಕ್ಕೆ ನಾನೇ ಸಂಪಾದಕ. ಆಗ ಎಲ್ಲ ಸೇರಿ ನನ್ನನ್ನು ಹುರಿದುಂಬಿಸಿದ್ದಕ್ಕೆ 'ಜಲಪಾತ' ಎಂಬ ಪದ್ಯವನ್ನು ಬರೆದೆ. 'ಭರ್ ಭರ್ ಎನ್ನುತಾ ಭೋರ್ಗರೆ ಇಕ್ಕುತ ಕಮರಿಯ ಸೇರುವ ಜಲಪಾತ...' ಒಂದಕ್ಕೊಂದು ಸಂಬಂಧವೇ ಇಲ್ಲದ ಬಾಲಿಶ ಕವಿತೆ ಬಿಡಿ ಅದು. ಜಲಪಾತ ಯಾಕೆ ಭರ್ ಅನ್ನುತ್ತೆ ಅ...
ಇನ್ನಷ್ಟು ಓದಿ

ಅವರ ಸುಸ್ವರಕ್ಕೆ ಸಾವಿಲ್ಲ

ಇವರಿಂದ
ಇಮೇಜ್
  ಕೊನೆಯ ನಿಲ್ದಾಣ ತಲುಪಿದ ಅಪರ್ಣಾ ! • ಮಂಜು ತಾಸುಗಟ್ಟಲೆ ಹೊತ್ತಿನಿಂದ ಕಾಯುತ್ತ ನಿಂತವರನ್ನು ಸರಿಯಾದ ಫ್ಲಾಟ್ ‌ ಫಾರ್ಮ್ ತಲುಪಿಸಿ , ಪ್ರಯಾಣದ ನಡುವೆ ಮೈಮರೆತು ಕುಂತವರನ್ನು ಸರಿಯಾದ ನಿಲ್ದಾಣದಲ್ಲಿ ಇಳಿಸಿ ಅಪರ್ಣಾ ನಿರ್ಗಮಿಸಿದ್ದಾರೆ . ಆದರೆ ಅವರ ಸುಮಧುರ ಕಂಠ ಇಲ್ಲಿ ಚಿರಸ್ಥಾಯಿಯಾಗಿದೆ . ಕನ್ನಡಿಗರ ಕಿವಿಗಳಿಗೆ ಅದು ಸದಾ ಕೇಳಿಸುತ್ತಿರುತ್ತದೆ . ‘ ಪ್ರಯಾಣಿಕರ ಗಮನಕ್ಕೆ , ಹುಬ್ಬಳ್ಳಿ - ಧಾರವಾಡ - ಮಂಗಳೂರು ನಡುವೆ ಸಂಚರಿಸುವ ಬಸ್ಸು ಇನ್ನು ಕೆಲವೇ ನಿಮಿಷಗಳಲ್ಲಿ ಫ್ಲಾಟ್ ‌ ಫಾರ್ಮ್ ಸಂಖ್ಯೆ ಆರರಲ್ಲಿ ಬಂದು ನಿಲ್ಲಲಿದೆ ’ ಎನ್ನುವ ಸಂದೇಶದಿ A ದ ಮೊದಲ್ಗೊಂಡು , ‘ ರೈಲು ಈಗ ಮಹಾತ್ಮಾ ಗಾಂಧಿ ರಸ್ತೆಗೆ ತಲುಪಲಿದೆ . ಬಾಗಿಲುಗಳು ಬಲಕ್ಕೆ ತೆರೆಯಲಿದೆ . ಇಳಿಯುವ ಮುನ್ನ ಅಂತರದ ಬಗ್ಗೆ ಗಮನವಿರಲಿ ’ ಎಂಬ ಮೆಟ್ರೊ ರೈಲಿನ ಧ್ವನಿಯ ತನಕ ಅಪರ್ಣಾ ಎಲ್ಲರಿಗೂ ಚಿರಪರಿಚಿತ . ಅಪರ್ಣಾ ವಸ್ತಾರೆ ಅವರ ಧ್ವನಿ ಇಷ್ಟಕ್ಕೆ ಮಾತ್ರ ಸೀಮಿತವಾಗಿರಲಿಲ್ಲ . ರಾಜ್ಯದ ಉದ್ದಗಲಕ್ಕೂ ನಡೆಯುವ ಕಾರ್ಯಕ್ರಮಗಳಲ್ಲಿ , ಉತ್ಸವಗಳಲ್ಲಿ ಅವರು ನಿರೂಪಣೆಗೆಂದು ನಿಂತುಬಿಟ್ಟರೆ ಕಾರ್ಯಕ್ರಮದ ಸಂಘಟಕರು ನಿರಾತಂಕವಾಗಿ ಇದ್ದುಬಿಡಬಹುದಿತ್ತು . ಯಾವ ಅವ್ಯವಸ್ಥೆ , ಅಪಸವ್ಯಗಳು ನಡೆಯದ ಹಾಗೆ ಕಾರ್ಯಕ್ರಮಗಳನ್ನು ನಿಭಾಯಿಸಿಕೊಂಡು ಹೋಗುವ ಚಾಕಚಕ್ಯತೆ ಅಪ...
ಇನ್ನಷ್ಟು ಓದಿ