ಭಾನುವಾರ, ಜುಲೈ 24, 2016

ಮೇಷ್ಟ್ರು ಮೆಚ್ಚಿದ ಕಥೆಗಳು...


ಗಂಧವತೀ ಪೃಥವಿ.. ಅಂದಹಾಗೆ ಚಂದವತೀ ಚಾಂದ್ ಕಥೆಗಳು.....ಅನುಭವಗಳನ್ನು ತಿಕ್ಕಿ, ತೀಡುವ ರಚನಾತ್ಮಕ ಗುಣ ನಿನ್ನ ಬರವಣಿಗೆಯಲ್ಲಿದೆ..ನೀನೊಬ್ಬಉತ್ತಮ ಕಥೆಗಾರ ಅನ್ನಲು "ಕದ ತೆರೆದ ಆಕಾಶ" ಕೃತಿಯೊಂದು ಸಾಕು... ಹೀಗೆ ಬರೆದಿದ್ದಾರೆ ನನ್ನ ಪ್ರೌಢಶಾಲಾ ದಿನಗಳ ಪ್ರೀತಿಯ ಮೇಷ್ಟ್ರು ಕೋ.ಶಿವಾನಂದ ಕಾರಂತ್ ಅವರು. ನನ್ನೂರು ಕುಂದಾಪುರದ ಜನಪ್ರಿಯ ಸಾಪ್ತಾಹಿಕ "ಕುಂದಪ್ರಭ''ದಲ್ಲಿ ಈ ವಾರ ಅವರ ಆತ್ಮೀಯ ಮಾತುಗಳು ಪ್ರಕಟವಾಗಿವೆ...ಬಹು ವರ್ಷಗಳ ಬಳಿಕ ಶಿಷ್ಯನ ಬೆಳವಣಿಗೆ ಕಂಡು ಗುರು ಬರೆದಿರುವ ಮೆಚ್ಚಿಗೆ ಮಾತುಗಳಿಂದ ಖುಷಿಯಾಗಿದೆ... ಗುರುವಿಗೆ ಶಿಷ್ಯನ ಪ್ರೀತಿಯ ವಂದೇ.







ಭಾನುವಾರ, ಜನವರಿ 3, 2016

ಕದ ತೆರೆದ ಆಕಾಶ -ಎರಡು ಪ್ರಮುಖ ವಿಮರ್ಶೆಗಳು...

ಕಳೆದ ನವೆಂಬರ್ ನಲ್ಲಿ ಬಿಡುಗಡೆಯಾದ ನನ್ನ ಕಥಾ ಸಂಕಲನ "ಕದ ತೆರೆದ ಆಕಾಶ" ಕೃತಿಯ ಬಗ್ಗೆ ಪತ್ರಕರ್ತ ಹಾಗೂ ಕಥೆಗಾರರೂ ಆದ ಡಾ. ಜಗದೀಶ್ ಕೊಪ್ಪ ಮತ್ತು ಡಾ.ವೆಂಕಟರಮಣ ಗೌಡ ಅವರು ಬರೆದಿರುವ ಎರಡು ಪ್ರಮುಖ ವಿಮರ್ಶೆಗಳು ಇಲ್ಲಿವೆ.....

ಮಂಜುನಾಥ್ ಚಾಂದ್ ರವರ ಚಂದನೆಯ ಕಥೆಗಳು....

-ಡಾ.ಜಗದೀಶ್ ಕೊಪ್ಪ, ಹುಬ್ಬಳ್ಳಿ

ನಮ್ಮ ನಡುವಿನ ಸೂಕ್ಷ್ಮ ಸಂವೇದನೆಯ ಪತ್ರಕರ್ತ ಹಾಗೂ ಕಥೆಗಾರ ಮಂಜುನಾಥ್ ಚಾಂದ್ ರವರ ಪ್ರಥಮ ಕಥಾ ಸಂಕಲನವಾದ “ ಕದ ತೆರೆದ ಆಕಾಶ” ಕೃತಿಯು ಹಲವುಕಾರಣಕ್ಕಾಗಿ ವಿಶಿಷ್ಟ ಕಥಾ ಸಂಕಲನವಾಗಿದೆಕುದುರೆಗಿಂತ ಅದರ ಲದ್ದಿ ಬಿರುಸು ಎನ್ನುವ ಗಾದೆಯಂತೆ ಇವೊತ್ತಿನ ಪತ್ರಿಕೋದ್ಯಮದಲ್ಲಿ ಸುದ್ದಿಗಿಂತ ಸದ್ದು ಮಾಡಿದ ಮತ್ತುಮಾಡುತ್ತಿರುವ ಪತ್ರಕರ್ತರೆ ಹೆಚ್ಚುಆದರೆಕಳೆದ ಇಪ್ಪತ್ತೈದು ವರ್ಷಗಳಿಂದ ಕನ್ನಡದ ಪ್ರಮುಖ ದಿನಪತ್ರಿಕೆಗಳಲ್ಲಿ ಮತ್ತು ದೃಶ್ಯ ಮಾಧ್ಯಮದಲ್ಲಿ ಸೇವೆ ಸಲ್ಲಿಸಿರುವ ಚಾಂದ್ ಸದಾ ಎಲೆಮರೆಯ ಕಾಯಿಯಂತೆತುಂಬಿದ ಕೊಡದಂತೆ ಬದುಕಿದವರುಅವರ  ವ್ಯಕ್ತಿತ್ವದ ಗುಣಗಳು   ಕಥಾ ಸಂಕಲದಲ್ಲಿ ಪ್ರತಿಬಿಂಬಿತವಾಗಿವೆ.

ಪತ್ರಕರ್ತನಾದವನಿಗೆ ಬರೆವಣಿಗೆ ಎಂಬುವುದು ವರವೂ ಹೌದುಶಾಪವೂ ಹೌದುಏಕೆಂದರೆಅವನು ಏನೇ ವಿಷಯವಿದ್ದರೂ ಬರೆದು ಬಿಸಾಡಬಲ್ಲ ಅಕ್ಷರ ಬ್ರಹ್ಮಆದರೆಅವರಬರೆವಣಿಗೆಯಲ್ಲಿ ಯಾವುದೇ ಜೀವಂತಿಕೆಯಾಗಲಿಲವಲವಿಕೆಯನ್ನಾಗಲಿ ಕಾಣುವುದು ಕಷ್ಟ ವಿಷಯದಲ್ಲಿ ಪಿ.ಲಂಕೇಶ್ ಮತ್ತು ರವಿಬೆಳೆಗೆರೆ ಸಾಹಿತ್ಯ ಮತ್ತು ಪತ್ರಿಕೋದ್ಯಮದಲ್ಲಿಎರಡಲ್ಲೂ ಅಕ್ಷರಗಳಿಗೆ ಜೀವ ತುಂಬಿದವರಲ್ಲಿ ಪ್ರಮುಖರು ಎಂದು ವಿಶೇಷವಾಗಿ ನಾವು ಹೆಸರಿಸಬಹುದುಅಂತಹ ಪರಂಪರೆಯ ವಾರಸುದಾರರಂತೆ ಕಾಣುವ ಮಂಜುನಾಥ್ ಚಾಂದ್ರವರ ಕಥೆಗಳಲ್ಲಿ ತಾವು ಹುಟ್ಟಿ ಬಂದ ಕಡಲ ತಡಿಯ ತಲ್ಲಣಗಳುಪಲ್ಲಟಗೊಳ್ಳುತ್ತಿರುವ ಸಾಂಸ್ಕತಿಕ ಚಹರೆಗಳುನಶಿಸುತ್ತಿರುವ ಮನುಷ್ಯ ಸಂಬಂಧಗಳು ಓದುಗರ ಎದೆಯ ಕದವನ್ನುತಟ್ಟುತ್ತವೆ.

ಇತ್ತೀಚಿಗಿನ ದಿನಗಳಲ್ಲಿ ತಮ್ಮ ವಿಶಿಷ್ಟ ಹಾಗೂ ಸೂಕ್ಷ್ಮ ಸಂವೇದನೆಯ ಕಥೆಗಳ ಮೂಲಕ ಕರ್ನಾಟಕದ  ಕರಾವಳಿ ಪ್ರದೇಶದಲ್ಲಿ ಕಾಸರಗೂಡಿನ ಹೆಣ್ಣು ಮಗಳು ಅನುಪಮಾ ಪ್ರಸಾದ್ತಮ್ಮ “ದೂರತೀರ” ಸಂಕಲನದಿಂದ ಮತ್ತು ಮಂಜುನಾಥ್ ಚಾಂದ್ “ಕದ ತೆರೆದ ಆಕಾಶ” ಸಂಕಲನದ ಮೂಲಕ  ಕನ್ನಡ ಕಥಾ ಜಗತ್ತು ಕುತೂಹಲದಿಂದ ಗಮನಿಸಲೇ ಬೇಕಾದಪ್ರತಿಭಾವಂತರು ಎಂಬ ಸಂದೇಶವನ್ನು ರವಾನಿಸಿದ್ದಾರೆ.

ಚಾಂದ್ ರವರು  ಕಥಾ ಸಂಕಲನದಲ್ಲಿ  ಕೇವಲ ಒಂಬತ್ತು ಕಥೆಗಳಿವೆಅವರೆಂದೂ ಖಯಾಲಿಗಾಗಿ ಕತೆ ಬರೆದವರಲ್ಲ ಹಾಗೂ ಬರೆಯುವವರಲ್ಲ ಎಂಬುದನ್ನು ಇಲ್ಲಿನ ಪ್ರತಿ ಕತೆಗಳುಸಾಬೀತು ಪಡಿಸಿವೆಏಕೆಂದರೆಕಳೆದ ಒಂಬತ್ತು ವರ್ಷಗಳಲ್ಲಿ ಅವರು ಬರೆದದ್ದು ಕೇವಲ ಒಂಬತ್ತೇ ಕತೆಗಳುವರ್ಷವೊಂದಕ್ಕೆ ಒಂಬತ್ತು ಕಥಾ ಸಂಕಲನಗಳನ್ನು ಹೊರ ತಂದು ಮೀಸೆತಿರುವುವ ಪತ್ರಕರ್ತರ ನಡುವೆ ಚಾಂದ್ ಮುಖ್ಯವಾಗುವುದು  ಕಾರಣಕ್ಕೆಅವರ ಕಥೆಗಳಲ್ಲಿ ನಗರ ಮತ್ತು ನಾಗರೀಕ ಜಗತ್ತಿನ ಅಮಾನವೀಯ ಮತ್ತು ಭಾವಶೂನ್ಯ ಬದುಕುಕುರಿತಂತೆ ಒಂದೆರಡು ಕತೆಗಳಿದ್ದರೂ ಸಹ ಉಳಿದ ಕಥೆಗಳು ತಾವು ಹುಟ್ಟಿ ಬೆಳೆದ ಕುಂದಾಪುರದ ಪರಿಸರದ  ಸುತ್ತ ಮುತ್ತಲಿನ ಕತೆಗಳಾಗಿವೆಜೊತೆಗೆ ನಾವು ವೈದೇಹಿಯವರಕಥೆಗಳಲ್ಲಿ ಓದಿದ್ದ ಕುಂದಾಪುರದ ಸುಂದರ ಕನ್ನಡ ಭಾಷೆಯ ಬನಿಯನ್ನು ಚಾಂದ್ ರವರ ಕಥೆಗಳಲ್ಲಿಯೂ ಸಹ ಸವಿಯಬಹುದು.



ನಮ್ಮ ನಡುವಿನ ಸೂಕ್ಷ್ಮ ಸಂವೇದನೆಯ ಪತ್ರಕರ್ತ ಹಾಗೂ ಕಥೆಗಾರ ಮಂಜುನಾಥ್ ಚಾಂದ್ ರವರ ಪ್ರಥಮ ಕಥಾ ಸಂಕಲನವಾದ “ ಕದ ತೆರೆದ ಆಕಾಶ” ಕೃತಿಯು ಹಲವುಕಾರಣಕ್ಕಾಗಿ ವಿಶಿಷ್ಟ ಕಥಾ ಸಂಕಲನವಾಗಿದೆಕುದುರೆಗಿಂತ ಅದರ ಲದ್ದಿ ಬಿರುಸು ಎನ್ನುವ ಗಾದೆಯಂತೆ ಇವೊತ್ತಿನ ಪತ್ರಿಕೋದ್ಯಮದಲ್ಲಿ ಸುದ್ದಿಗಿಂತ ಸದ್ದು ಮಾಡಿದ ಮತ್ತುಮಾಡುತ್ತಿರುವ ಪತ್ರಕರ್ತರೆ ಹೆಚ್ಚುಆದರೆಕಳೆದ ಇಪ್ಪತ್ತೈದು ವರ್ಷಗಳಿಂದ ಕನ್ನಡದ ಪ್ರಮುಖ ದಿನಪತ್ರಿಕೆಗಳಲ್ಲಿ ಮತ್ತು ದೃಶ್ಯ ಮಾಧ್ಯಮದಲ್ಲಿ ಸೇವೆ ಸಲ್ಲಿಸಿರುವ ಚಾಂದ್ ಸದಾ ಎಲೆಮರೆಯ ಕಾಯಿಯಂತೆತುಂಬಿದ ಕೊಡದಂತೆ ಬದುಕಿದವರುಅವರ  ವ್ಯಕ್ತಿತ್ವದ ಗುಣಗಳು   ಕಥಾ ಸಂಕಲ£ದಲ್ಲಿ ಪ್ರತಿಬಿಂಬಿತವಾಗಿವೆ.

ಪತ್ರಕರ್ತನಾದವನಿಗೆ ಬರೆವಣಿಗೆ ಎಂಬುವುದು ವರವೂ ಹೌದುಶಾಪವೂ ಹೌದುಏಕೆಂದರೆಅವನು ಏನೇ ವಿಷಯವಿದ್ದರೂ ಬರೆದು ಬಿಸಾಡಬಲ್ಲ ಅಕ್ಷರ ಬ್ರಹ್ಮಆದರೆಅವರಬರೆವಣಿಗೆಯಲ್ಲಿ ಯಾವುದೇ ಜೀವಂತಿಕೆಯಾಗಲಿಲವಲವಿಕೆಯನ್ನಾಗಲಿ ಕಾಣುವುದು ಕಷ್ಟ ವಿಷಯದಲ್ಲಿ ಪಿ.ಲಂಕೇಶ್ ಮತ್ತು ರವಿಬೆಳೆಗೆರೆ ಸಾಹಿತ್ಯ ಮತ್ತು ಪತ್ರಿಕೋದ್ಯಮದಲ್ಲಿಎರಡಲ್ಲೂ ಅಕ್ಷರಗಳಿಗೆ ಜೀವ ತುಂಬಿದವರಲ್ಲಿ ಪ್ರಮುಖರು ಎಂದು ವಿಶೇಷವಾಗಿ ನಾವು ಹೆಸರಿಸಬಹುದುಅಂತಹ ಪರಂಪರೆಯ ವಾರಸುದಾರರಂತೆ ಕಾಣುವ ಮಂಜುನಾಥ್ ಚಾಂದ್ರವರ ಕಥೆಗಳಲ್ಲಿ ತಾವು ಹುಟ್ಟಿ ಬಂದ ಕಡಲ ತಡಿಯ ತಲ್ಲಣಗಳುಪಲ್ಲಟಗೊಳ್ಳುತ್ತಿರುವ ಸಾಂಸ್ಕತಿಕ ಚಹರೆಗಳುನಶಿಸುತ್ತಿರುವ ಮನುಷ್ಯ ಸಂಬಂಧಗಳು ಓದುಗರ ಎದೆಯ ಕದವನ್ನುತಟ್ಟುತ್ತವೆ.

ಇತ್ತೀಚಿಗಿನ ದಿನಗಳಲ್ಲಿ ತಮ್ಮ ವಿಶಿಷ್ಟ ಹಾಗೂ ಸೂಕ್ಷ್ಮ ಸಂವೇದನೆಯ ಕಥೆಗಳ ಮೂಲಕ ಕರ್ನಾಟಕದ  ಕರಾವಳಿ ಪ್ರದೇಶದಲ್ಲಿ ಕಾಸರಗೂಡಿನ ಹೆಣ್ಣು ಮಗಳು ಅನುಪಮಾ ಪ್ರಸಾದ್ತಮ್ಮ “ದೂರತೀರ” ಸಂಕಲನದಿಂದ ಮತ್ತು ಮಂಜುನಾಥ್ ಚಾಂದ್ “ಕದ ತೆರೆದ ಆಕಾಶ” ಸಂಕಲನದ ಮೂಲಕ  ಕನ್ನಡ ಕಥಾ ಜಗತ್ತು ಕುತೂಹಲದಿಂದ ಗಮನಿಸಲೇ ಬೇಕಾದಪ್ರತಿಭಾವಂತರು ಎಂಬ ಸಂದೇಶವನ್ನು ರವಾನಿಸಿದ್ದಾರೆ.

ಚಾಂದ್ ರವರು  ಕಥಾ ಸಂಕಲನದಲ್ಲಿ  ಕೇವಲ ಒಂಬತ್ತು ಕಥೆಗಳಿವೆಅವರೆಂದೂ ಖಯಾಲಿಗಾಗಿ ಕತೆ ಬರೆದವರಲ್ಲ ಹಾಗೂ ಬರೆಯುವವರಲ್ಲ ಎಂಬುದನ್ನು ಇಲ್ಲಿನ ಪ್ರತಿ ಕತೆಗಳುಸಾಬೀತು ಪಡಿಸಿವೆಏಕೆಂದರೆಕಳೆದ ಒಂಬತ್ತು ವರ್ಷಗಳಲ್ಲಿ ಅವರು ಬರೆದದ್ದು ಕೇವಲ ಒಂಬತ್ತೇ ಕತೆಗಳುವರ್ಷವೊಂದಕ್ಕೆ ಒಂಬತ್ತು ಕಥಾ ಸಂಕಲನಗಳನ್ನು ಹೊರ ತಂದು ಮೀಸೆತಿರುವುವ ಪತ್ರಕರ್ತರ ನಡುವೆ ಚಾಂದ್ ಮುಖ್ಯವಾಗುವುದು  ಕಾರಣಕ್ಕೆಅವರ ಕಥೆಗಳಲ್ಲಿ ನಗರ ಮತ್ತು ನಾಗರೀಕ ಜಗತ್ತಿನ ಅಮಾನವೀಯ ಮತ್ತು ಭಾವಶೂನ್ಯ ಬದುಕುಕುರಿತಂತೆ ಒಂದೆರಡು ಕತೆಗಳಿದ್ದರೂ ಸಹ ಉಳಿದ ಕಥೆಗಳು ತಾವು ಹುಟ್ಟಿ ಬೆಳೆದ ಕುಂದಾಪುರದ ಪರಿಸರದ  ಸುತ್ತ ಮುತ್ತಲಿನ ಕತೆಗಳಾಗಿವೆಜೊತೆಗೆ ನಾವು ವೈದೇಹಿ ಅವರ ಕಥೆಗಳಲ್ಲಿ ಓದಿದ್ದ ಕುಂದಾಪುರದ ಸುಂದರ ಕನ್ನಡ ಭಾಷೆಯ ಬನಿಯನ್ನು ಚಾಂದ್ ರವರ ಕಥೆಗಳಲ್ಲಿಯೂ ಸಹ ಸವಿಯಬಹುದು.

ನಗರದ ಬದುಕಿನ ಕಥೆಗಳಿಗಿಂತ ಹೆಚ್ಚಾಗಿ ತಮ್ಮ ಪರಿಸರ ಕಥೆಗಳನ್ನು ಕಟ್ಟಿಕೊಡುವಲ್ಲಿ ಯಶಸ್ವಿಯಾಗಿರುವ ಚಾಂದ್ ರವರ ನಿರೂಪಣೆ ಮತ್ತು ಕಥೆಗಳ ಪಾತ್ರಗಳಿಗೆ ಬಳಸಿರುವಭಾಷೆಯಲ್ಲಿ ಕವಿಯೊಬ್ಬನ ಪ್ರತಿಭೆ ಅನಾವರಣಗೊಂಡಿದೆ ಸಂಕಲನದ ತಿಮಿರಸವೆದ ಹಾದಿಯ ಉಸಿರುಹೊಳೆ ದಂಡೆಯ ಆಚೆಸಂತೆಯಿಂದ ಬಂದವನುಊರಿಗೆ ಬಂದದೇವರು ಕಥೆಗಳು ಗಮನ ಸೆಳೆಯುತ್ತವೆಜೊತೆಗೆ ಓದುಗರ ಮನದಲ್ಲಿ ಬಹುಕಾಲ ನಿಲ್ಲುತ್ತವೆ.


ಜಾಗತೀರಣವೆಂಬುದು ಸದ್ದಿಲ್ಲದೆಅದೃಶ್ಯ ರೂಪದಲ್ಲಿ ನಮ್ಮನ್ನ ಹಿಂಬಾಲಿಸಿಕೊಂಡು ಬರುತ್ತಿರುವ  ಬೆಂಬಿಡದ ಭೂತ. ನಮಗರಿವಾಗದಂತೆ ಅದು ನಮ್ಮನ್ನು ತಬ್ಬಿಕೊಂಡು  ಹೊಸಕಿ ಹಾಕುತ್ತಿರುವ ವರ್ತಮಾನದ ದುರಂತಗಳು ಚಾಂದ್ ರವರ ಕಥೆಗಳಲ್ಲಿ ರೂಪಕದ ಭಾಷೆಯ ಮೂಲಕ  ಪರಿಣಾಮಕಾರಿಯಾಗಿ ವ್ಯಕ್ತವಾಗಿವೆನಾವು  ಹುಟ್ಟಿ ಬೆಳೆದು ಓಡಾಡಿದ ನೆಲವೆಂಬುದು,  ಈಗ  ನಮ್ಮದೆರು  ಆದುನಿಕತೆಯ ಕಾಡ್ಗಿಚ್ಚಿಗೆ ಸಿಲುಕಿಇತ್ತ ಒಣಗಲಾರದ,  ಅತ್ತ ಬೇರು ಬಿಡಲಾರದ ಅರೆ ಬೆಂದ ಹಸಿರು ಮರದಂತಾಗಿದೆಅಂತಹ ನೋವಿನ,ಸಂಕಟದ ಕ್ಷಣಗಳನ್ನು ಚಾಂದ್ ತಮ್ಮ ಕಥೆಗಳ ಪಾತ್ರಗಳ ಮೂಲಕ ಸಶಕ್ತವಾಗಿ ಅಭಿವ್ಯಕ್ತಿಗೊಳಿಸಿದ್ದಾರೆ.  ಜೊತೆಗೆ ಅವರ ಮುಂದಿನ ಕಥೆಗಳ ಕುರಿತು ನಮ್ಮಲ್ಲಿ ಆಸೆ ಮೂಡಿಸಿದ್ದಾರೆ.





ಚಾಂದ್ ಕಥೆಗಳು: ಹೊಸ ಕಾಲವನ್ನು ಕಾಣುವ ಬಿಂದು


-ಡಾ.ವೆಂಕಟರಮಣ ಗೌಡ, ಅಂಕೋಲ, 


ತೀವ್ರ ತಲ್ಲಣದ ಮುಂದೆ ನಮ್ಮೊಳಗಿನ ಮನುಷ್ಯನ ಗುರುತು ಹಿಡಿಯಲಾರದೆ ನಿಂತವನು ಭಾಷಣವನ್ನಷ್ಟೇ ಮಾಡಬಲ್ಲ.ಮಾನುಷ ಚಹರೆಗಳ ಮೃದುತ್ವ ಮತ್ತು ಒರಟುತನವೆರಡನ್ನೂ ಗ್ರಹಿಸಿದವನು ಮಾತ್ರವೇ ಈ ಜಗತ್ತಿನ ತಲ್ಲಣ ಮತ್ತು ಮುಗ್ಧ ತನ್ಮಯತೆಯ ಇದಿರಿನಲ್ಲಿ ಮಾತಿಲ್ಲದೆ ನಿರುತ್ತರಿಯಂತೆ ನಿಲ್ಲುತ್ತಾನೆ. ಮೊದಲನೆಯವನದು ವರದಿಗಾರಿಕೆ; ಎರಡನೆಯವನದು ಕಥೆಗಾರಿಕೆ. ಪತ್ರಕರ್ತ ಮಂಜುನಾಥ್ ಚಾಂದ್ ಅವರ ಕಥೆಗಳು ಫಲಿಸುವುದು, ನಮ್ಮ ಸುತ್ತಲಿನ ಚಲನೆಗಳನ್ನು ಕಾಣುವ ಮತ್ತು ಕಂಡಿರಿಸುವ ಬಗೆಯಲ್ಲಿನ ಮೀರುವಿಕೆ ಹಲವು ದಿಕ್ಕುಗಳಿಂದ, ಹಲವು ನೆಲೆಗಳಿಂದ ಕ್ರಮಿಸುತ್ತ, ನಿಜದ ರೂಹಿನೊಳಗೆ ಪ್ರಾಣ ಪ್ರತಿಷ್ಠೆ ಮಾಡುವುದೆಂಬುದರ ನಿರೂಪಗಳಾಗುವ ಮೂಲಕ.
“ಕದ ತೆರೆದ ಆಕಾಶ” ಸಂಕಲನದಲ್ಲಿ 2005ರಿಂದ ಚಾಂದ್ ಅವರು ಬರೆದ ಒಂಬತ್ತು ಕಥೆಗಳಿವೆ. ಈ ಹತ್ತು ವರ್ಷಗಳಲ್ಲಿ ಒಂಬತ್ತೇ ಕಥೆಗಳು ಎಂಬುದು ಚಾಂದ್ ಅವರ ಸಂಯಮಕ್ಕೆ ಮಾತ್ರವಲ್ಲ, ಪರವಶವಾಗದ ನೋಡುವಿಕೆಗೂ ಸಾಕ್ಷಿ. ಪತ್ರಕರ್ತನ ವೃತ್ತಿಯ ಮಧ್ಯೆ ಪುರುಸೊತ್ತಾದಾಗ ಹವ್ಯಾಸದಂತೆ ಬರೆದ ಕಥೆಗಳಲ್ಲ ಇವು. ಬದಲಾಗಿ, ಕಥನದ ಗಾಂಭೀರ್ಯಕ್ಕೆ ಒಪ್ಪಿಸಿಕೊಂಡು ಹಂಗಿಲ್ಲದ ಹಾದಿಗಳಲ್ಲಿ ನಡೆಯುತ್ತ ಕೇಳಿಸಿಕೊಂಡದ್ದರ ಮಾರ್ನುಡಿಯಂತಿವೆ. ಈ ಕಥೆಗಳ ಓದಿನಲ್ಲಿ ಸಿಗುವ ಜಗತ್ತು ನಮ್ಮೊಳಗಿನ ಹೊಳೆಗಳಿಗೆ ಸಮುದ್ರದ ಅಗಾಧತೆಯನ್ನು ಕಲಿಸುವ ಮತ್ತು ನಮ್ಮೊಳಗಿನ ಸಮುದ್ರವನ್ನು ಹೊಳೆಗಳ ಕಡೆಗೆ ನಡೆಸುವ ಬೆರಗನ್ನು ಧರಿಸಿದ್ದಾಗಿದೆ.
ಸುಮ್ಮನೆ ಒಮ್ಮೆ ಈ ಕಥೆಗಳ ಹೆಸರು ಗಮನಿಸಿದರೆ, ಹೊರಳುವಿಕೆಯನ್ನು, ಅಯನವನ್ನು, ಅಂಥ ತುಡಿತವನ್ನು ಅವು ಸೂಚಿಸುತ್ತಿರುವುದು ಗೊತ್ತಾಗುತ್ತದೆ. ‘ಸಂತೆಯಿಂದ ಬಂದವನು’, ‘ಹೊಳೆ ದಂಡೆಯ ಆಚೆ’, ‘ಗೋಡೆಗಳನು ದಾಟಿ’, ‘ಊರಿಗೆ ಬಂದ ದೇವರು’ ಹೀಗೆ. ಇನ್ನೂ ಸೂಕ್ಷ್ಮವಾಗಿ ಅದು ತಾಕಲಾಟ. ಪ್ರಾದೇಶಿಕ ಎಂಬುದಕ್ಕಿಂತ ಮಿಗಿಲಾಗಿ ಮನಸ್ಸಿನೊಳಗಿನ ಸಂಘರ್ಷ. ಮೇಲ್ನೋಟಕ್ಕೆ, ಆಡುನುಡಿಯೂ ಸೇರಿ ಒಂದು ಪ್ರಾದೇಶಿಕ ಶರೀರವುಳ್ಳದ್ದಾಗಿ ಕಾಣುವ ಈ ಕಥೆಗಳು ಆಳದಲ್ಲಿ ಅದನ್ನು ಮೀರುವ ತಹತಹವನ್ನೇ ಉಸಿರಾಡುತ್ತಿವೆ. ಆ ತಹತಹ ಮೂಲವಾದ ಪ್ರಯಾಣದ ಕೊನೆ ಕೂಡ ಕೊನೆಗಾಣದ ಕದನದ ಹತಾಶೆಯೊಂದಿಗೇ ಮಡುಗಟ್ಟುವುದರಲ್ಲಿ ಈ ಕಥೆಗಳಿಗೆ ಒಂದು ತೆರನಾದ ಅವಿರತತೆಯು ಒದಗಿದೆ. ನಾನು ಈ ಮಾತು ಹೇಳುತ್ತಿರುವುದು ‘ತಿಮಿರ’, ‘ಸಂತೆಯಿಂದ ಬಂದವನು’, ‘ಕುಬೇರ ಶಿಕಾರಿ’, ‘ಊರಿಗೆ ಬಂದ ದೇವರು’ ಈ ಕಥೆಗಳನ್ನು ಮನಸ್ಸಿನಲ್ಲಿಟ್ಟುಕೊಂಡು. ಗಾಢ ನಿರೀಕ್ಷೆಯೊಂದು ತಣ್ಣಗೆ ಹುಸಿಹೋಗುವಲ್ಲಿ ಧುತ್ತನೆ ಎದುರಾಗುವ ಕ್ರೌರ್ಯ ಅರಗಿಸಿಕೊಳ್ಳಲಿಕ್ಕೆ ಆಗದಂಥದ್ದು. ಆ ಆಘಾತವನ್ನು ಹೊತ್ತುಕೊಂಡೇ ಬದುಕು ಮುಂದುವರಿಯಲಿರುವುದರ ಸುಳಿವಿನೊಂದಿಗೆ ತಲ್ಲಣಗಳ ತೀರದಲ್ಲಿ ಓದುಗನನ್ನು ತಂದು ನಿಲ್ಲಿಸುತ್ತವೆ ಚಾಂದ್ ಅವರ ಕಥೆಗಳು.
‘ಸವೆದ ಹಾದಿಯ ಉಸಿರು’, ‘ಹೊಳೆ ದಂಡೆಯ ಆಚೆ’, ‘ಗೋಡೆಗಳನು ದಾಟಿ’ ಕಥೆಗಳು ಮತ್ತೊಂದು ಬಗೆಯವು. ಹಲವು ಯಾತನೆಗಳಲ್ಲಿ ನರಳುವ ಹಂಬಲವು ಅಂತಿಮವಾಗಿ ಗೆಲ್ಲುವುದನ್ನು ಹೇಳುವ ಈ ಕಥೆಗಳಲ್ಲಿ, ಜಂಜಡದ, ಸಂಕಟದ, ಅಪಸ್ವರಗಳ ಹಾದಿಯೇ ಉದ್ದಕ್ಕೂ ಚಾಚಿಕೊಂಡಿದೆ. ಆದರೆ ಅವನ್ನೆಲ್ಲ ದಾಟುವುದರೊಂದಿಗೆ ನಿಕ್ಕಿಯಾದ ನಿರಾಳತೆಯಲ್ಲಿ ಕಾಣಿಸುವುದು ಜೀವನಪ್ರೀತಿಯ ಪ್ರಭೆ.
‘ಕದ ತೆರೆದ ಆಕಾಶ’ ಮತ್ತು ‘ಕಂಚಿಮಳ್ಳು’ ಕಥೆಗಳು ಬಹುಮುಖ್ಯವಾದವುಗಳಾಗಿ ನನಗೆ ಕಾಣಿಸುತ್ತವೆ. ಚಾಂದ್ ಅವರು ಮತ್ತೆ ಮತ್ತೆ ಬರೆಯಬಹುದಾದ ಕಥೆಗಳ ವಿನ್ಯಾಸವೊಂದು ಈ ಎರಡು ಕಥೆಗಳಲ್ಲಿ ಮೈಗೂಡಿದೆ ಎಂಬುದು ನನ್ನ ದೃಢವಾದ ನಂಬಿಕೆ. ಇದನ್ನು ಸ್ವಲ್ಪ ವಿಸ್ತರಿಸಿ ಹೇಳುವುದಾದರೆ, ಬದುಕು, ಭಾವನೆ, ಭಾಷೆ, ವ್ಯಾವಹಾರಿಕವಾದದ್ದರ ಪೈಪೋಟಿ, ಪ್ರೀತಿ ಪ್ರೇಮದಂಥದ್ದನ್ನು ಆಕ್ರಮಿಸಿಕೊಳ್ಳಲು ಹವಣಿಸುತ್ತಿರುವ ಮತ್ತೇನೋ ಒಂದು ಇವೆಲ್ಲವನ್ನೂ ಒಳಗೊಂಡ ಇವತ್ತಿನ ಜಗತ್ತು ಮತ್ತು ಅದು ತೆಗೆದುಕೊಳ್ಳಬಹುದಾದ ಅನಿರೀಕ್ಷಿತ, ಅನಪೇಕ್ಷಿತ ತೀರ್ಮಾನಗಳಲ್ಲಿ ಏಕಕಾಲದಲ್ಲೇ ಸ್ವಾತಂತ್ರ್ಯವನ್ನು ಕೊಟ್ಟಂತೆ ಮಾಡುತ್ತ ಇನ್ನೊಂದೆಡೆಯಿಂದ ಕಸಿದುಕೊಳ್ಳುತ್ತಲೂ ಇರುವ ಚೋದ್ಯವಿದೆ. ಇಲ್ಲಿ ಒಂದು ಗಂಡು ಹೆಣ್ಣು ತಮ್ಮ ಸ್ವಾಭಿಮಾನ, ಸ್ವಂತಿಕೆ ಮತ್ತು ಸ್ವಾತಂತ್ರ್ಯವನ್ನು ಬಯಸುತ್ತ ಮತ್ತು ಘೋಷಿಸಿಕೊಳ್ಳುತ್ತಲೇ ಇವಾವುದೂ ಸಾಧ್ಯವಾಗಲು ಆಸ್ಪದವಿರದ ಶರಣಾಗತ ಸ್ಥಿತಿಯಲ್ಲಿ ಬಯಸಿ ಬಯಸಿಯೇ ಸಿಲುಕುವುದು ನಡೆಯುತ್ತದೆ. ಉದ್ವೇಗ ಮತ್ತು ಗೊಂದಲಗಳು ಅವರೊಳಗಿನ ಭ್ರಮಾಧೀನ ನಿಚ್ಚಳತೆಯ ಸೆರಗಿನಲ್ಲೇ ಅಡಗಿರುತ್ತವೆ. ಹಾಗಾಗಿ ಭ್ರಮೆ ಒಡೆದುಕೊಂಡ ಪ್ರತಿ ಬಾರಿಯೂ ಸ್ಥಿತ್ಯಂತರ. ಇಂಥ, ತೀರ್ಮಾನಗಳಿಗೆ ದೀರ್ಘಾಯಸ್ಸು ಇಲ್ಲದ ಅವಸ್ಥೆಯಲ್ಲಿ, ಬದಲಾಗುತ್ತಿರುವ ತೀರ್ಮಾನಗಳ ಜೊತೆಗಿನ ಪ್ರಯಾಣದಲ್ಲೇ ಬದುಕು ದಣಿದುಬಿಡುವಲ್ಲಿ ತೆರೆದುಕೊಳ್ಳುವ ಆಧ್ಯಾತ್ಮಿಕ ಸ್ಪರ್ಶದ ಭಾವುಕ ಸಾಧ್ಯತೆ ಹೊಸ ಕಾಲದ ವ್ಯಂಗ್ಯವೊ ತೀವ್ರತೆಯೊ ಗೊತ್ತಾಗುವುದಿಲ್ಲ.ಒಟ್ಟಿನಲ್ಲಿ ಇದು ನಿಗೂಢವಾದಂಥ ಮತ್ತು ನಿಲುಗಡೆಯಿಲ್ಲದಂತೆ ತೋರುವ ಯಾನ. ಈ ಸ್ಥಿತಿಯ ಒಳಗನ್ನು ಶೋಧಿಸಲು ಹೊರಟಂತಿರುವ ಚಾಂದ್ ಅವರು, ಈ ಎರಡು ಕಥೆಗಳಲ್ಲಿ ಕಟ್ಟಿಕೊಡುವ ಅನುಭೂತಿ ವಿಶಿಷ್ಟವಾದುದಾಗಿದೆ.
‘ಕದ ತೆರೆದ ಆಕಾಶ’ ಕಥೆಯ ಜಾಹ್ನವಿ ನಿಜವಾಗಿಯೂ ಜಾಹ್ನವಿಯಲ್ಲ ಮತ್ತು ಅವಳು ಜಾಹ್ನವಿಯಾಗಿಯೇ ಬದುಕಲು ಬಯಸುತ್ತಿದ್ದಾಳೆ ಎಂಬ ಸತ್ಯ, ಅದಕ್ಕೆ ಪ್ರತಿಯಾಗಿ ‘ಕೆಲವರು ಸುಳ್ಳುಗಳ ಹೊದಿಕೆಯಲ್ಲೇ ಬದುಕುತ್ತಿರುತ್ತಾರೆ’ ಎಂಬ ತ್ಯಾಗರಾಜನ ತಕರಾರಿನಲ್ಲಿರುವ ಸತ್ಯ ಈ ಮುಖಾಮುಖಿ ಅಪರೂಪದ್ದಾಗಿದೆ. ಅವಳು ಬಿಟ್ಟುಬಂದಿರುವ ಅವಳ ಗಂಡನ ಪರವಾಗಿ ತ್ಯಾಗರಾಜ ವಕಾಲತ್ತು ನಡೆಸುತ್ತಾನೆ ಅವಳೆದುರಿನಲ್ಲಿ. ಇದೆಲ್ಲವೂ ಎಲ್ಲರನ್ನೂ ಜಲಸಮಾಧಿ ಮಾಡಿಬಿಡುವಂತೆ ಸುರಿದ ಮಳೆಯ ನಡುವೆ ಇನ್ನೇನು ಬದುಕು ಮುಗಿದೇಹೋಯಿತು ಎಂಬ ಘಟ್ಟ ಮುಟ್ಟಿ ಕಡೆಗೂ ಬದುಕುಳಿದ ದೀರ್ಘ ನಿಟ್ಟುಸಿರಿನ ಹೊತ್ತಲ್ಲಿ ಜರುಗುತ್ತದೆ. ಇಡೀ ಕಥೆಯೇ ಒಂದು ಅಸಾಧಾರಣ ರೂಪಕವಾಗಿ ಆವರಿಸಿಕೊಳ್ಳುತ್ತದೆ. ‘ಕಂಚಿಮಳ್ಳು’ ಕಥೆ ಕೂಡ ಇಷ್ಟೇ ನಾಟಕೀಯತೆಯೊಂದಿಗೆ ತೆರೆದುಕೊಳ್ಳುತ್ತದೆ. ದೇವ್ರು ಭಟ್ಟ ಮತ್ತು ಇಂದ್ರಾಣಿ ಅಲ್ಲಿ ಬರೀ ಪಾತ್ರಗಳಲ್ಲ. ನಮ್ಮ ಗೊಂದಲ, ಮಹತ್ವಾಕಾಂಕ್ಷೆ, ಹುಚ್ಚುತನ, ಆದರ್ಶ ಮತ್ತು ಇವೆಲ್ಲವನ್ನೂ ಆಳದಲ್ಲಿ ನಿರ್ವಹಿಸುವ ಕಾಮನೆಯ ಪ್ರವಹಿಸುವಿಕೆಯಾಗಿ ದೇವ್ರು ಮತ್ತು ಇಂದ್ರಾಣಿ ವಿಸ್ತಾರಗೊಳ್ಳುತ್ತಾರೆ.
ಕುತೂಹಲದ ಸಂಗತಿಯೊಂದಿದೆ. ಏನೆಂದರೆ, ‘ಕದ ತೆರೆದ ಆಕಾಶ’ದಲ್ಲಿನಂತೆ ‘ಕಂಚಿಮಳ್ಳು’ ಕಥೆಯಲ್ಲೂ ಮಳೆ ಬರುತ್ತದೆ. ಮೊದಲನೆಯದರಲ್ಲಿ ದುರಂತವನ್ನೇ ತರುತ್ತದೆ ಎನ್ನಿಸಿ ಆತಂಕ ಸೃಷ್ಟಿಸುವ ಮತ್ತು ಅದೇ ವೇಗದಲ್ಲೇ ಎದುರಾಗುತ್ತಿರುವ ಅಂತ್ಯಕ್ಕೆ ಸಜ್ಜುಗೊಳಿಸುವ ಮಳೆ; ಎರಡನೆಯದರಲ್ಲಿ ಶಾಲೆಯ ಗೋಡೆಯ ಮೇಲೆ ದೇವ್ರು ಬರೆದ ಇಂದ್ರಾಣಿಯ ಚಿತ್ರವನ್ನು ಅಳಿಸುವ ಮೂಲಕ ತೀರಾ ಕೌಟುಂಬಿಕವಾದದ್ದೊಂದು ಅನಗತ್ಯವಾಗಿ ಜನರ ಬಾಯಿಗೆ ಬೀಳುವುದನ್ನು ತಪ್ಪಿಸುವ ಮಳೆ. ಬದುಕನ್ನು ಹದಗೊಳಿಸುವ ಒಂದು ಶಕ್ತಿಯಂತೆ ಮಳೆ ವ್ಯಕ್ತಗೊಳ್ಳುತ್ತದೆ ಇಲ್ಲಿ.
ಗಂಡು ಹೆಣ್ಣಿನ ನಡುವಿನ ಸಂಬಂಧ ಮತ್ತು ದಾಂಪತ್ಯದ ಬಿಕ್ಕಟ್ಟುಗಳನ್ನು ಸಶಕ್ತವಾಗಿ ಚಾಂದ್ ಕಥನಿಸಬಲ್ಲರು ಎಂಬುದಕ್ಕೂ ‘ಕದ ತೆರೆದ ಆಕಾಶ’ ಮತ್ತು ‘ಕಂಚಿಮಳ್ಳು’ ಕಥೆಗಳು ಋಜುವಾತಿನಂತಿವೆ. ‘ನೀವು ಜಾಹ್ನವಿ ಅಲ್ಲ, ಅಹಲ್ಯಾ ಅನ್ನುವುದನ್ನು ಸಾಬೀತು ಮಾಡುವ ತಾಕತ್ತು ಈ ಎಡಗಾಲಿನ ಗೆಜ್ಜೆಗಿದೆ. ನಿಮ್ಮ ಆಕರ್ಷಕ ಕಣ್ಣುಗಳು ಗೆಜ್ಜೆಗೆ ರಿದಂ ಕೊಡುವುದನ್ನು ನಿಲ್ಲಿಸಿರಬಹುದು. ಒಬ್ಬ ಈಶ್ವರ ಪ್ರಸಾದ ತಪಸ್ವಿ ಆ ರಿದಂನಲ್ಲೇ ಬದುಕುತ್ತಿದ್ದಾನೆ. ಒಬ್ಬ ನೃತ್ಯಗಾತಿ ಅಹಲ್ಯಾ ಆತನ ಕೋಣೆಗಳಲ್ಲಿ ಇನ್ನೂ ಜೀವಂತವಾಗಿದ್ದಾಳೆ’ ಎಂಬ ತ್ಯಾಗರಾಜನ ಮಾತಿನಲ್ಲಿ ದಾಂಪತ್ಯದ ಒಂದು ಇತಿಹಾಸವೇ ಪ್ರಜ್ವಲಿಸುತ್ತಿದೆ. ಆದರೆ ‘ಒಂದು ಸ್ಪರ್ಶದಲ್ಲಿರುವ ಪ್ರೀತಿಯ ಜೀವಂತಿಕೆಯನ್ನು ಅನುಭವಿಸಲಾರದಷ್ಟು ದೂರ ಸರಿದು ಬಂದಿದ್ದೇನೆ’ ಎಂದು ಒಪ್ಪಿಕೊಳ್ಳುವ ಜಾಹ್ನವಿ ಅಲಿಯಾಸ್ ಅಹಲ್ಯಾ ಅನುಭವಿಸುತ್ತಿರುವ ಸಂಘರ್ಷ ಕೂಡ ಅದೇ ದಾಂಪತ್ಯದ ಕಥೆಯನ್ನು ಮತ್ತೊಂದು ಮಗ್ಗುಲಿಂದ ಬಿಡಿಸಿಡುತ್ತಿದೆ. ‘ಸಂಬಂಜಕ್ಕಿಂತ ಬದುಕು ದೊಡ್ಡದು ದೇವ್ರು. ಸಂಬಂಜದ ಗಂಟುಗಳೊಳಗೆ ಸಿಕ್ಕಾಕೊಂಡ್ರೆ ಅದರಾಚೆಗಿನ ಬದುಕು ಕಾಣ್ತಿಲ್ಲೆ. ನೀ ಊರೊಳಗಿನ ದೇವರನ್ನು ನಂಬಿಕೊಂಡಂವಾ. ನಾ ಅದರಾಚೆಗಿನ ಜೀವ್ನಾ ಕಾಣವು’ ಎಂದು ಹೇಳಿ ಅವನನ್ನು ಮದುವೆಯಾಗುವುದರಿಂದ ತಪ್ಪಿಸಿಕೊಂಡು ಹೋಗಿದ್ದ ಇಂದ್ರಾಣಿ, ಅದೇ ದೇವ್ರು ಸಾರ್ವಜನಿಕ ಸ್ಥಳದಲ್ಲಿ ಬರೆದ ತನ್ನ ಚಿತ್ರದ ಕಾರಣದಿಂದಾಗಿ ವಾಪಸಾಗುತ್ತಾಳೆ. ‘ಎಲ್ಲ ಸಂಬಂಜಕ್ಕೂ ಮನಸ್ಸೂ ಅಂತ ಇರ್ತಿಲ್ಲೆ’ ಎನ್ನುತ್ತಿದ್ದ ದೇವ್ರು ಹಾಗೆ ತನ್ನೊಳಗಿನ ಇಂದ್ರಾಣಿಯನ್ನು ಹೂಬೇಹೂಬು ಬರೆದದ್ದು ಒಂದು ಬೆರಗಿನಂತೆ ಕಾಡುತ್ತದೆ. ಇವೆಲ್ಲದರ ಮೂಲಕ ಚಾಂದ್ ಅವರು ಸಂಬಂಧಗಳ ಸೂಕ್ಷ್ಮತೆ, ನಿಗೂಢತೆ, ವೈರುದ್ಧ್ಯಗಳನ್ನು ಮತ್ತು ಇದೆಲ್ಲದಕ್ಕಿಂತ ಹೆಚ್ಚಾಗಿ ನಿಷ್ಕಾರಣ ಪ್ರೀತಿಯ ಶಕ್ತಿ ಮತ್ತು ಸಂಕಟಗಳನ್ನು ಧ್ಯಾನಿಸುತ್ತಾರೆ.
ಚಾಂದ್ ಅವರು ಕಥೆಗಾರಿಕೆಯನ್ನು ಗಂಭೀರವಾಗಿ ತೆಗೆದುಕೊಂಡವರು ಎಂಬುದನ್ನು ಆರಂಭದಲ್ಲೇ ಹೇಳಿದೆ. ಕಥೆ ಸುಲಭವಾಗಿ ದಕ್ಕಿಬಿಡಬೇಕು ಎಂಬ ಆತುರವಾಗಲಿ, ಸುಲಭದಲ್ಲೇ ದಕ್ಕುತ್ತದೆ ಎಂಬ ಭ್ರಮೆಯಾಗಲಿ ಅವರಿಗೆ ಇಲ್ಲ. ಕಥನದ ಹೊಳಹುಗಳಿಗಾಗಿ ಕಾಯುವ ಚಾಂದ್, ಕಥೆ ಹೇಳಲು ತುಸು ದುರ್ಗಮವೆನ್ನಿಸುವಂಥ ಹಾದಿಯನ್ನು ಆಯ್ದುಕೊಳ್ಳುತ್ತಾರೆ. ಹಾಗಾಗಿಯೇ ಅವರ ಕಥೆಗಳಲ್ಲಿ ಗದ್ದಲವಿಲ್ಲ. ಎಂಥ ಅಬ್ಬರವನ್ನೂ ತಣ್ಣಗಿನ ತನ್ಮಯತೆಯಲ್ಲೇ ಹೇಳಿಬಿಡುವ ಅವರ ಧಾಟಿಗೆ ಕಡಲಿನೆದುರು ನಿಂತವನ ದೃಢತೆ ಮತ್ತು ನಿರ್ದಾಕ್ಷಿಣ್ಯ ಮನಃಸ್ಥಿತಿಯಲ್ಲಿ ಏರ್ಪಡುವ ಉಲ್ಲಂಘನೆಯ ಗುಣ ಇದೆ. ಹೊಸ ಕಾಲವು ಕೇಳುತ್ತಿರುವ ಕಥೆಗಳನ್ನು ಕಾಣಬಲ್ಲ ಬಿಂದುವನ್ನು ಗಳಿಸಿಕೊಳ್ಳಬಲ್ಲವರಾಗಿದ್ದಾರೆ ಅವರು.

ಶುಕ್ರವಾರ, ಡಿಸೆಂಬರ್ 25, 2015

ಬದುಕು ಗೆಲ್ಲಿಸುವ ಸಿಮರೂಬ....

ಧರೆಗಿಳಿದ ಸ್ವರ್ಗಸೀಮೆಯ ಸಸ್ಯ.... 

ಕ್ಯಾನ್ಸರ್ ಮುಕ್ತ ನಾಡು ಕಟ್ಟುವ-ಡಾ.ಜೋಷಿ ದಂಪತಿ ಕನಸು 


ಆತನ ಹೆಸರು ನಚಿಕೇತ್. ಬೆಂಗಳೂರಿನ ಪ್ರತಿಷ್ಠಿತ ಕಾಲೇಜಿನಲ್ಲಿ ಪಿಯುಸಿಗೆ ಸೇರ್ಪಡೆಯಾಗಿದ್ದ. ಆಗ ಆತನಿಗೆ ಕಾಣಿಸಿಕೊಂಡಿದ್ದು ಮಾರಕ ಕಾಯಿಲೆ. `ಇದು ಬ್ಲಡ್ ಕ್ಯಾನ್ಸರ್, ತಕ್ಷಣ ಚಿಕಿತ್ಸೆ ಆರಂಭಿಸಿ' ಎಂದು ವೈದ್ಯರು ಸಲಹೆ ಮಾಡುತ್ತಾರೆ. ಕುಟುಂಬ ಕಣ್ಣೀರಾಗುತ್ತದೆ, ಬೆಳೆದು ನಿಂತ ಮಗನ ಭವಿಷ್ಯವೇ ಮುಗಿದು ಹೋದಂತೆ ಕುಸಿದು ಕುಳಿತು ಬಿಡುತ್ತದೆ. ಧೃತಿಗೆಡದ ಅಪ್ಪ-ಅಮ್ಮ ಮೊದಲ ಕಿಮೋಥೆರಪಿಯನ್ನೂ ಮಾಡಿಸುತ್ತಾರೆ. ಆ ಸಮಯದಲ್ಲೇ ಅವರಿಗೆ ಸಿಕ್ಕ ಮಾಹಿತಿ-ಸಿಮರೂಬಚಿಕಿತ್ಸೆ. ಬೇರೇನನ್ನೂ ಯೋಚಿಸದೇ ಚಿಕಿತ್ಸೆ ಶುರು ಮಾಡಿಕೊಳ್ಳುತ್ತಾರೆ. ಆರು ತಿಂಗಳು ನಿರಂತರ ಚಿಕಿತ್ಸೆ. ಬಳಿಕ ಕ್ಲಿನಿಕಲ್ ಟೆಸ್ಟ್; ಕ್ಯಾನ್ಸರ್ ಇರುವ ಸಣ್ಣ ಕುರುಹೂ ಕಾಣಿಸುವುದಿಲ್ಲ!

ಸಿಮರೂಬ ಗಿಡ (ಲಕ್ಷ್ಮೀತರು)ದೊಂದಿಗೆ ಡಾ. ಜೋಷಿ ದಂಪತಿ

 ಆಕೆಯ ಹೆಸರು ಸುಲೇಖಾ. ಇಬ್ಬರು ಮಕ್ಕಳ ತಾಯಿ. ಆಕೆಗೆ ಕಾಣಿಸಿಕೊಂಡಿದ್ದು ಮೆಲನೋಮಾ. ಇದೊಂದು ಚರ್ಮರೋಗ. ಕ್ಯಾನ್ಸರ್ ನಲ್ಲಿಯೇ ಅತ್ಯಂತ ಮಾರಕವಿದು ಎನ್ನುತ್ತಾರೆ ವೈದ್ಯರು. ಸುಲೇಖಾ ಪತ್ನಿಗೆ ತಜ್ಞ ವೈದ್ಯರು ಹೇಳಿದ್ದು ಇಷ್ಟು; ಬದುಕಿದ್ದರೆ ಮೂರು ಅಥವಾ ನಾಲ್ಕು ತಿಂಗಳು ಮಾತ್ರ! ಆದರೆ ಕಿದ್ವಾಯಿ ಆಸ್ಪತ್ರೆಯ ಹಿರಿಯ ವೈದ್ಯರಾದ ಡಾ.ವಿಜಯಲಕ್ಷ್ಮೀ ದೇಶಮಾನೆ ಅವರು ಸುಲೇಖಾಗೆ ಮಾಡಿದ ಸಲಹೆ- ಸಿಮರೂಬ ಚಿಕಿತ್ಸೆ. "ಕೊನೆಯ ಪ್ರಯತ್ನವಾಗಿ ಡಾ. ಶ್ಯಾಮಸುಂದರ ಜೋಷಿ ಅವರನ್ನು ಭೇಟಿ ಮಾಡಿ" ಎಂಬ ಮಾರ್ಗದರ್ಶನ. ಸಿಮರೂಬದ ಶರಣು ಹೋದ ಸುಲೇಖಾ ಎರಡು ವರ್ಷಗಳು ಕಳೆದಿವೆ. ಈಗ ದಿನವೂ ಬಿಎಂಟಿಸಿ ಬಸ್ಸು ಹತ್ತಿ ಕೆಲಸಕ್ಕೆ ಹೋಗುತ್ತಾರೆ. ಮನೆಯ ಎಲ್ಲ ಜವಾಬ್ದಾರಿಯನ್ನು ನೋಡಿಕೊಳ್ಳುತ್ತಾರೆ. ಅವರೀಗ ಸಂಪೂರ್ಣ ಗುಣಮುಖಿ!

ಬೆಂಗಳೂರಿನ ನಾಗರಭಾವಿಯ ಸಹೀದಾಗೆ ಸಂಧಿವಾತ. ಇದನ್ನು rheumatoid arthritis ಎನ್ನುತ್ತಾರೆ. ಕೈ-ಕಾಲಿನ ಗಂಟುಗಳಲ್ಲಿ ಅಸಾಧ್ಯ ಯಾತನೆ. ಕುಂತರೆ ಏಳಲಾಗದ ಸ್ಥಿತಿ. 2009ರಿಂದ ಈ ರೋಗದಿಂದ ಬಳಲುತ್ತಿದ್ದ ಆಕೆ, ಕೊನೆಗೆ ಶುರು ಮಾಡಿಕೊಂಡಿದ್ದು ಸಿಮರೂಬ ಚಿಕಿತ್ಸೆಯನ್ನು. 2014ರ ಜನವರಿಯಲ್ಲಿ ಚಿಕಿತ್ಸೆ ಆರಂಭಿಸಿದ ಸಹೀದಾಗೆ ಅದೇ ವರ್ಷದ ಜುಲೈ ಹೊತ್ತಿಗೆ ಎಲ್ಲ ನೋವಿನಿಂದ ಮುಕ್ತಿ. ಈಗ ಎರಡು-ಮೂರು ಮಹಡಿ ಮೆಟ್ಟಿಲುಗಳನ್ನು ಅವರೇ ಹತ್ತಿ ಇಳಿಯುತ್ತಾರೆ. ಅವರದ್ದೀಗ ನಿರಾಳ ಜೀವನ....

ಎಷ್ಟೋ ಬಾರಿ ಹಾಗೇ, ಬದುಕು ಮುಗಿದೇ ಹೋಯಿತು, ಕಣ್ಣು ಮುಚ್ಚಿ ಕುಳಿತರೂ ಕುಸಿದು ಹೋದ ಅನುಭವ....

ಹೀಗೆ ಜೀವನದ ಕೊನೆಯ ಬಾಗಿಲು ಹಾಕಲು ಮಾನಸಿಕವಾಗಿ ಸಿದ್ಧತೆ ಮಾಡಿಕೊಂಡ ನೂರಾರು ಜನರಿಗೆ ಹೊಸ ಬೆಳಕು ಮೂಡಿಸಲು ಕುಂತಿರುವವರು ಡಾ.ಶ್ಯಾಮಸುಂದರ ಜೋಷಿ ಮತ್ತು ಡಾ. ಶಾಂತಾ ಜೋಷಿ ದಂಪತಿ. ಸಸ್ಯಶಾಸ್ತ್ರ ತಜ್ಞರಾದ ಇಬ್ಬರೂ ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯದ ನಿವೃತ್ತ ಪ್ರೋಫೆಸರ್.

ರಾಜ್ಯದ ಮೂಲೆ ಮೂಲೆಗಳಿಂದ ನೂರಾರು ಜನ ಅವರ ಮನೆಗೆ ಎಡತಾಕುತ್ತಾರೆ. ಬದುಕು ಕಣ್ಣು ಮುಚ್ಚೇ ಬಿಟ್ಟಿತು, ಕೊನೆಯ ಆಸೆಯಿಂದ ಬಂದಿದ್ದೇವೆ ಎನ್ನುತ್ತಾರೆ. ಅವರು ದೊಡ್ಡದಾಗಿ ನಕ್ಕು `ಸಿಮರೂಬ ತಾಯಿಯನ್ನು ಪ್ರೀತಿಸಿ, ನೂರಕ್ಕೆ ನೂರು ಎಲ್ಲವೂ ಸರಿ ಹೋಗುತ್ತದೆ' ಎಂಬ ಭರವಸೆ ನೀಡುತ್ತಾರೆ. ಅವರ ಮನೆ ಇರುವುದು ಬೆಂಗಳೂರಿನ ಆರ್.ಟಿ.ನಗರದ ಬಾಜೂಕು ಇರುವ ಆನಂದನಗರದಲ್ಲಿ. ಜೋಷಿ ದಂಪತಿ ಎಲ್ಲರನ್ನೂ ಸಮಚಿತ್ತದಿಂದ ಸ್ವಾಗತಿಸುತ್ತಾರೆ. ಸಾಂತ್ವನ ಹೇಳುತ್ತಾರೆ. ಚಿಕಿತ್ಸೆ ಪಡೆದು ಬದುಕು ಕಣ್ಣು ತೆರೆದು ಖುಷಿಯಾದವರನ್ನು ಕಂಡು ಧನ್ಯರಾಗುತ್ತಾರೆ.

ಕಾಯಿಲೆಯಿಂದ ಗುಣಮುಖರಾದ ಅದೃಷ್ಟಶಾಲಿಗಳು ಬರೆದಿರುವ ನೋಟ್... 
ಹಾಗೆ ಮಾರಕ ಕಾಯಿಲೆಗಳಿಂದ ಮುಕ್ತಿ ಪಡೆದು ಸುಖಜೀವನ ನಡೆಸುತ್ತಿರುವವರ ದೊಡ್ಡ ಪಟ್ಟಿಯೇ ಅವರ ಬಳಿಯಿದೆ. ಮೇಲೆ ಪ್ರಸ್ತಾಪಿಸಿದ ಎಲ್ಲ ಪ್ರಕರಣಗಳೂ ಅವರೇ ಕಾಯ್ದಿಟ್ಟಿರುವ ನೋಟ್ ಬುಕ್ ಗಳಲ್ಲಿ ರೋಗಿಗಳೇ ಬರೆದುಕೊಂಡಿರುವ ನಿಜ ಸಂಗತಿಗಳು. ಜೋಷಿ ಅವರ Book rack ನಲ್ಲಿ ಇಂತಹ ಕನಿಷ್ಠ 25 ಪುಸ್ತಕಗಳಿವೆ. ಅದರ ಪುಟಪುಟಗಳಲ್ಲೂ ಯಾತನೆಯ ಕಥೆಗಳು ಮತ್ತು ಕೊನೆಯಲ್ಲಿ ಸುಖಾಂತ್ಯದ ನೋಟ್!



ಈಚೆಗೆ ತಾನೆ ಜೋಷಿ ಅವರ ಮನೆಗೆ ಹೋದಾಗ ಒಂದು ಹೃದ್ಯ ಸನ್ನಿವೇಶಕ್ಕೆ ಸಾಕ್ಷಿಯಾಗಬೇಕಾಯಿತು. ಬ್ಲಡ್ ಕ್ಯಾನ್ಸರ್ ಪೀಡಿತ ನಚಿಕೇತ್ (ಲೇಖನದ ಆರಂಭದಲ್ಲಿ ಪ್ರಸ್ತಾಪಿಸಿದ ಹುಡುಗ) ಸಂಪೂರ್ಣ ಗುಣಮುಖನಾಗಿ ಜೋಷಿ ದಂಪತಿಯ ಆಶೀರ್ವಾದ ಪಡೆಯಲು ಬಂದಿದ್ದ. `ನಾಳೆಯಿಂದಲೇ ಕಾಲೇಜಿಗೆ ಹೋಗಬೇಕು, ಅದಕ್ಕೇ ಆಶೀರ್ವಾದ ಪಡೆಯಲು ಬಂದಿದ್ದೇನೆ' ಎನ್ನುತ್ತಾನೆ ಆತ. `ಇವೆಲ್ಲವೂ ತಾಯಿ ಸಿಮರೂಬ ಮಹಿಮೆ, ನನ್ನದೇನೂ ಇಲ್ಲ' ಎನ್ನುತ್ತ ನಗುತ್ತಾರೆ ಜೋಷಿ. ನಚಿಕೇತನ ಅಮ್ಮನ ಕಣ್ಣಿನಲ್ಲಿ ಭರವಸೆಯ ಬೆಳಕು. ನಚಿಕೇತನ ಕಣ್ಣಿನಲ್ಲಿ ಬದುಕು ಗೆದ್ದ ಖುಷಿ.....

ಒಂದು ಸಿಮರೂಬ ಗಿಡ ಮನುಷ್ಯನ ಸುತ್ತ ಸುಭದ್ರವಾದ ಆರೋಗ್ಯ ಕವಚವನ್ನೇ ಸೃಷ್ಟಿಸಬಲ್ಲುದು ಎಂದರೆ ನಿಜಕ್ಕೂ ಅಚ್ಚರಿಯಾಗುತ್ತದೆ. ಕೇವಲ ಆರೋಗ್ಯ ಮಾತ್ರವಲ್ಲ, ಮನುಷ್ಯನಿಗೆ ಇರುವ ಇದರ ಪ್ರಯೋಜನಗಳ ಶಾಖೆ ಅನೇಕ. ಜೋಷಿ ದಂಪತಿ ಕಳೆದ 20 ವರ್ಷಗಳಲ್ಲಿ ಸಿಮರೂಬದ ಮೇಲೆ ಅನೇಕ ಸಂಶೋಧನೆ, ಪ್ರಯೋಗಗಳನ್ನು ಮಾಡಿದ್ದಾರೆ. ಕೆಲವನ್ನು ತಮ್ಮ ಮೇಲೇ ಪ್ರಯೋಗ ಮಾಡಿಕೊಂಡಿದ್ದಾರೆ. ಅಮೀಬಿಯಾಸಿಸ್ ಎಂಬ ರೋಗದಿಂದ ಬಹಳ ಕಾಲ ಬಳಲುತ್ತಿದ್ದ ಶ್ಯಾಮಸುಂದರ ಜೋಷಿ ಕೊನೆಗೆ ಮೊರೆ ಹೋಗಿದ್ದು ಕೂಡ ಸಿಮರೂಭಕ್ಕೆ. ಅಲ್ಲಿಂದಾಚೆಗೆ ಅವರು ಬದಲಾಗಿದ್ದಾರೆ, ಇಳಿ ವಯಸ್ಸಿನಲ್ಲಿರುವ ಜೋಷಿ ದಂಪತಿ ಅನೇಕರ ಬದುಕನ್ನು ಬದಲಿಸಿದ್ದಾರೆ. ಪ್ರತಿ ದಿನ ಮಧ್ಯಾಹ್ನ 2ರಿಂದ ಸಂಜೆ ಆರರ ತನಕ ಅವರ ಮನೆಯಲ್ಲಿ ಕುಂತು ಬಿಟ್ಟರೆ "ಬದಲಾದ ಬದುಕಿನ ಚಿತ್ರಣ" ನಿಮ್ಮ ಕಣ್ಣ ಮುಂದೆ ತೆರೆದುಕೊಳ್ಳುತ್ತದೆ.

ಇದು ಆ್ಯಂಟಿ ಬ್ಯಾಕ್ಟೀರಿಯಲ್, ಆ್ಯಂಟಿ ವೈರಲ್, ಆ್ಯಂಟಿ ಹೆಲ್ಮೆಂಟಿಕ್, ಆ್ಯಂಟಿ ಪ್ರೊಟೋಝೋವಾ ಮತ್ತು ಆ್ಯಂಟಿ ಕ್ಯಾನ್ಸರ್ ಎಂದು ಅರಳು ಹುರಿದಂತೆ ವಿವರಕ್ಕೆ ಶುರು ಮಾಡುವ ಜೋಷಿ, ಸಿಮರೂಭದ ಕಷಾಯವನ್ನು ಬಾಯಲ್ಲಿಟ್ಟು ಹತ್ತು ನಿಮಿಷ ಮುಕ್ಕಳಿಸಿದರೆ ಹಲ್ಲಿನ ವಸಡು ಸಮಸ್ಯೆ, ಬಾಯಲ್ಲಿ ಕೆಟ್ಟ ವಾಸನೆ ಮಾಯವಾಗುತ್ತದೆ. ಜೀರ್ಣಾಂಗ ವ್ಯವಸ್ಥೆಯ ಉದ್ದಕ್ಕೆ ಎಲ್ಲಿಯೇ ರಕ್ತಸ್ರಾವ ಇರಲಿ ಗುಣವಾಗುವುದು ಖಚಿತ. ಅಲ್ಸರ್ ಯಾವುದೇ ಹಂತದಲ್ಲಿರಲಿ ಒಂದರಿಂದ ಆರು ತಿಂಗಳಲ್ಲಿ ಶಮನ ಗ್ಯಾರೆಂಟಿ. ಚಿಕೂನ್ ಗುನ್ಯ, ಹೆಚ್1ಎನ್1, ಡೆಂಗ್ಯೂ, ಹಂದಿಜ್ವರ, ಸಂಧಿವಾತ, ಹೆಪಟೈಟಿಸ್-ಬಿ., ಕರುಳುಬೇನೆ ಹೀಗೆ ಅನೇಕ ಕಾಯಿಲೆಗಳನ್ನು ಶಮನ ಮಾಡಿದ ಪಟ್ಟಿಯನ್ನವರು ಕೊಡುತ್ತಾರೆ.

ಲಂಡನ್ನಲ್ಲಿ ವೈದ್ಯರಾಗಿರುವ ಡಾ. ರಾಜೀವ್ ರಂಗರಾಜನ್ ಐದು ವರ್ಷಗಳಿಂದ ಅಲ್ಸರೆಟಿವ್ ಕೊಲೈಟಿಸ್ ನಿಂದ ಬಳಲುತ್ತಿದ್ದರು. ವಿದೇಶದಲ್ಲಿಯೇ ಅನೇಕ ದೊಡ್ಡ ಡಾಕ್ಟರ್ ಗಳ ಸಲಹೆ ಪಡೆಯುತ್ತಾರೆ. "ಆಹಾರ ಕ್ರಮದಲ್ಲಿ ನಿಯಂತ್ರಣ ಸಾಧಿಸಿ ಮತ್ತು ಅದರ ಪಾಡಿಗೆ ಅದನ್ನು ಬಿಟ್ಟುಬಿಡಿ, ಇನ್ನೇನು ಮಾಡಲು ಸಾಧ್ಯವಿಲ್ಲ" ಎಂದು ಅವರು ಕೈಚೆಲ್ಲುತ್ತಾರೆ. ಕೊನೆಗೆ ಬೆಂಗಳೂರಿನ ಮಲ್ಲೇಶ್ವರದಲ್ಲಿರುವ ತಮ್ಮ ಮನೆಗೆ ಬಂದಾಗ ಅವರ ಅರಿವಿಗೆ ಬಂದಿದ್ದು ಸಿಮರೂಬ ಚಿಕಿತ್ಸೆ. ತಕ್ಷಣ ಜೋಷಿ ಅವರಿಂದ ಚಿಕಿತ್ಸೆ ಆರಂಭಿಸುತ್ತಾರೆ. ಈಗವರು ಅಲ್ಸರೆಟಿವ್ ನಿಂದ ಸಂಪೂರ್ಣ ಮುಕ್ತರಾಗಿದ್ದಾರೆ. ಡಾ. ರಾಜೀವ್ ಅವರು ಪ್ರತಿ ಬಾರಿ ಭಾರತಕ್ಕೆ ಬಂದಾಗ ಮುದ್ದಾಂ ಜೋಷಿ ಅವರನ್ನು ಭೇಟಿ ಮಾಡಿಯೇ ಮಾಡುತ್ತಾರೆ. ಒಂದಿಷ್ಟು ಕಷಾಯ, ಹುಡಿ ಪಡೆದು ಅಮೆರಿಕಕ್ಕೆ ಮರಳುತ್ತಾರೆ.

ಕ್ಯಾನ್ಸರ್ ಮೊದಲ ಮತ್ತು ಎರಡನೇ ಹಂತದಲ್ಲಿದ್ದರೆ ಸಿಮರೂಬ ಬಿಟ್ಟು ಬೇರಿನ್ನಾವುದೇ ಔಷಧಿಯ ಅಗತ್ಯವಿಲ್ಲ, ಕಿಮೋ ಥೆರಪಿ ಆರಂಭ ಮಾಡಿದ್ದರೂ ಪರ್ಯಾಯವಾಗಿಯೂ ಇದನ್ನು ಸೇವಿಸುತ್ತ ಬರಬಹುದು. ಅದರ ಪರಿಣಾಮದ ಅರಿವಾಗುವುದನ್ನು ನೀವೇ ಗಮನಿಸುವಿರಿ. ಕೊನೆಗೆ ತಲೆಕೂದಲೂ ಉದುರುವುದಿಲ್ಲ. ಹುಬ್ಬಳ್ಳಿಯ ಕವಿತಾ ಎಂಬವರಿಗೆ ಮಿದುಳಿನ ಕ್ಯಾನ್ಸರ್ ಆಪರೇಷನ್ ಆಗಿತ್ತು, ವೈದ್ಯರು ಆಕೆಯ ಬದುಕಿಗೆ ಮೂರು ತಿಂಗಳ ಗಡುವು ಕೊಟ್ಟಿದ್ದರು. ಕಳಚಿ ಹೋಗುವ ಜೀವನ ಸೌಧದ ಚಿತ್ರವನ್ನು ಕಣ್ಣ ಮುಂದೆ ಇಟ್ಟುಕೊಂಡೇ ಅವರು ಸಿಮರೂಬ ಥೆರಪಿ ಆರಂಭ ಮಾಡಿದರು. ವೈದ್ಯರು ಕೊಟ್ಟ ಬದುಕಿನ ಗಡುವು ಮುಗಿದು ಆರು ವರ್ಷಗಳೇ ಕಳೆದಿವೆ. ಕಳೆದ ಆರು ವರ್ಷಗಳಿಂದ ಆಕೆ ತನ್ನ ಪ್ರತಿ ಸುಖ, ಸಂತೋಷವನ್ನು ಜೋಷಿ ಅವರ ಬಳಿ ಹಂಚಿಕೊಳ್ಳುತ್ತಾರೆ, ಮೊನ್ನೆ ತಾನೆ ಆಳೆತ್ತರಕ್ಕೆ ಬೆಳೆದ ಸಿಮರೂಬ ಮರದ ಪಕ್ಕದಲ್ಲಿ ನಿಂತು ಫೊಟೋ ತೆಗೆಸಿ ಕಳಿಸಿದ್ದಾರೆ.

ಸೀದಾ ಸೀದಾ ಅಸ್ತಿಮಜ್ಜೆಗೆ ದಾಳಿ ಮಾಡುವ ಮಲ್ಟಿಪಲ್ ಮೈಲೋಮಾಕ್ಕೆ ಒಳಗಾದ 56 ವರ್ಷದ ಶಿವಮೊಗ್ಗದ ರಾಮಚಂದ್ರ ಎಲ್ಲ ಇಂಗ್ಲಿಷ್ ಚಿಕಿತ್ಸೆಯ ಬಳಿಕ ಇನ್ನು ಸಾವಷ್ಟೇ ಖಾತರಿ ಎಂದುಕೊಂಡಿದ್ದರು. ಅವರ ಮಗ ತಂದೆಗೆ ಕೊಡಿಸಿದ್ದು ಸಿಮರೂಬ ಚಿಕಿತ್ಸೆ. ನಾಲ್ಕೇ ತಿಂಗಳಲ್ಲಿ ಅವರು ಮತ್ತೆ ತಮ್ಮ ದ್ವಿಚಕ್ರ ವಾಹನದಲ್ಲಿ ಕೆಲಸಕ್ಕೆ ಹೋಗಲು ಆರಂಭಿಸಿದ್ದಾರೆ. ಮಗ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾರೆ.

ಈಗ ಅರಣ್ಯ ಇಲಾಖೆಯವರೂ ಇದನ್ನು ಬೆಳೆಸುತ್ತಾರೆ.... ನಿಮ್ಮ ಬಡಾವಣೆಯಲ್ಲಿ ತೋಟದಲ್ಲಿ ಈ ಸಸ್ಯವಿರಲಿ

ಆರೋಗ್ಯ ರಕ್ಷಣೆಯೊಂದೇ ಇದರ ತಾಕತ್ತಲ್ಲ, ಯಾವುದೇ ಬರಡು ಭೂಮಿಯಲ್ಲಿ ಇದನ್ನು ಬೆಳೆಯಿರಿ- ಸಿಮರೂಬ ಎತ್ತರಕ್ಕೆ ಬೆಳೆದು ಹಸಿರಾಗುತ್ತದೆ. ಹಾಗಾಗಿ ಇದು  ಧರೆಗಿಳಿದ ಸ್ವರ್ಗ ಸೀಮೆಯ ಸಸ್ಯ,ಅದಕ್ಕೆ  ತಾಯಿ ಸಿಮರೂಬ ಎಂಬ ಹೆಗ್ಗಳಿಕೆ ಎನ್ನುತ್ತಾರೆ ಜೋಷಿ. ಆಹಾರ, ಆರೋಗ್ಯ, ಔಷಧಿ, ಇಂಧನ, ರಸಗೊಬ್ಬರ... ಹೀಗೆ ಸಿಮರೂಬ ಪ್ರಯೋಜನಗಳನ್ನು ಪಟ್ಟಿ ಮಾಡಬಹುದು. ಲ್ಯಾಟಿನ್ ಅಮೆರಿಕ ಮೂಲವಾಗಿರುವ ಇದರ ನಾಲ್ಕೇ ನಾಲ್ಕು ಬೀಜಗಳನ್ನು ಕುತೂಹಲಕ್ಕೆಂದು ಜಿಕೆವಿಕೆಯಲ್ಲಿ ನೆಟ್ಟರೆ ಅದು ಮುಂದಿನ ತಲೆಮಾರಿನ ರಕ್ಷಕ ಎಂಬುದು ಸಾಬೀತಾಗುತ್ತ ಹೋಯಿತು.

ಜೋಷಿ ದಂಪತಿ ಮುಂದೆ ಕುಂತರೆ ಸಿಮರೂಬಕ್ಕೆ ಸಂಬಂಧಿಸಿದ ನೂರಾರು ಕಥೆಗಳನ್ನು ಹೇಳುತ್ತ ಹೋಗುತ್ತಾರೆ. ಹೀಗೆ ಜನ ಸಿಮರೂಬದ ಪರಿಣಾಮವನ್ನು ತಮಗೆ ತಾವೇ ಅನುಭವಿಸಿದ ಬಳಿಕ ಎಲ್ಲಿ ಸಾಧ್ಯವೋ ಅಲ್ಲಿ ಈ ಗಿಡವನ್ನು ಬೆಳೆಸಲು ಆರಂಭಿಸಿದ್ದಾರೆ. ಯಾವುದೇ ವಾತಾವರಣದಲ್ಲಿ, ಯಾವುದೇ ನೆಲದಲ್ಲಿ ಇದನ್ನು ಬೆಳೆಯಬಹುದು. ಪಾರ್ಕ್, ದೇವಸ್ಥಾನ, ಸ್ಮಶಾನ,  ಬಡಾವಣೆಯ ರಸ್ತೆ ಬದಿಯಲ್ಲಿ ಎಲ್ಲಿ ಬೇಕಾದರೂ ನೆಡಬಹುದು. ಕೇವಲ ಎರಡು ವರ್ಷ ಕಷ್ಟಪಟ್ಟು ಈ ಗಿಡಗಳನ್ನು ನೆಟ್ಟು ಸಲಹಿ, ಐದನೇ ವರ್ಷಕ್ಕೆ ಹೂ, ಬೀಜ ಬಿಡಲು ಆರಂಭಿಸುತ್ತದೆ ಮತ್ತು ಅದು ನಿಮ್ಮನ್ನು ಆರವತ್ತು ವರ್ಷಗಳ ಕಾಲ ಕಾಪಾಡುತ್ತದೆ. ಅದರ ಗಾಳಿ ಸೇವನೆ ಮಾಡುತ್ತ ಬದುಕಿ, ಕ್ಯಾನ್ಸರ್ ಮುಕ್ತವಾಗಿ, ರೋಗಮುಕ್ತವಾಗಿ. ಕ್ಯಾನ್ಸರ್ ಎಂಬುದು ಕುಬೇರನ ವ್ಯಾಧಿ. ಅದು ಬಂದಿತೆಂದರೆ ಲಕ್ಷಾಂತರ ರೂ. ಕಬಳಿಸಿ ಹಾಕುತ್ತದೆ. ಅಂತಹ ಮಾರಕ ರೋಗಕ್ಕೆ ಅಂಕುಶವೊಡ್ಡುವ ಶಕ್ತಿಯಿರುವ ಸಿಮರೂಬ ಸಮಾಜದ ಕಟ್ಟಕಡೆಯ ವ್ಯಕ್ತಿಗೂ ಲಭ್ಯವಾಗಬೇಕು. ನಮ್ಮದು ಕ್ಯಾನ್ಸರ್ ಮುಕ್ತ ರಾಷ್ಟ್ರವಾಗಬೇಕು. ಮುಂದಿನ ತಲೆಮಾರು ನೆಮ್ಮದಿಯಿಂದ ಬದುಕಬೇಕು ಎಂಬುದು ನನ್ನ ಕನಸು ಎನ್ನುವ ಜೋಷಿ ಅವರು ನನ್ನ ಬೊಗಸೆಗೆ ಒಂದು ಮುಷ್ಟಿ ಸಿಮರೂಬ ಬೀಜಗಳನ್ನು ಹಾಕಿ `ನಿಮ್ಮ ಬಡಾವಣೆಯಲ್ಲಿ ಎಲ್ಲಾದರೂ ಬೀಜ ಹಾಕಿ, ಅದರ ಪಾಡಿಗೆ ಅದು ಬೆಳೆದುಕೊಳ್ಳಲಿ' ಎಂದು ಮುಗುಳ್ನಗುತ್ತಾರೆ. ಅವರು ನನ್ನ ಬೊಗಸೆಗೆ ಇಟ್ಟ ಗಿಡ ನಮ್ಮೂರಲ್ಲೂ ಬೆಳೆಯುತ್ತಿದೆ-ಮುಂದಿನ ತಲೆಮಾರಿಗೆ.


(ರೋಗಿಗಳ ಹೆಸರುಗಳನ್ನು ಬದಲಿಸಲಾಗಿದೆ)

ಒಂದು ಗಿಡ ಕಲಿಸಿದ ನೂರಾರು ಪಾಠಗಳು....

ಡಾ. ಶಾಂತಾ ಜೋಷಿ
ಸಿಮರೂಬ 1993ರಲ್ಲಿ ಮೊದಲ ಬಾರಿಗೆ ಹೂ ಬಿಟ್ಟಿತು. 95ರಿಂದ ಚಿಕಿತ್ಸೆಗಾಗಿ ಇದನ್ನು ಕೊಡುವುದಕ್ಕೆ ಆರಂಭಿಸಿದೆವು. ಮೊದಲ ಪ್ಲಾಂಟಿಂಗ್ ಮಾಡಿದ್ದು 85ರಲ್ಲಿ. ಜಿಕೆವಿಕೆಯಲ್ಲಿ ಸನ್ ಫ್ಲವರ್ ಯೋಜನೆಯ ಮುಖ್ಯಸ್ಥಳಾಗಿದ್ದ ಸಂದರ್ಭದಲ್ಲಿ ಒರಿಸ್ಸಾಗೆ ಹೋಗಿದ್ದ ನಮ್ಮ ನಿರ್ದೇಶಕರಾದ ಡಾ.ಕೆ.ಕೃಷ್ಣಮೂರ್ತಿ ಅವರು ಅಲ್ಲಿಂದ ನಾಲ್ಕು ಬೀಜಗಳನ್ನು ತಂದಿದ್ದರು. ಸಂಶೋಧನೆಯ ಕಾರಣದಿಂದ ಅದನ್ನು ನೆಟ್ಟೆವು. ಮುಂದೆ ಅದು ಹೂ ಬಿಟ್ಟು ಬೆಳೆಯತೊಡಗಿದಾಗ ಒಂದೊಂದಾಗಿ ಅದರ ಮಹತ್ವಗಳ ಬಗ್ಗೆ ಅಧ್ಯಯನ ಮಾಡುತ್ತ ಹೋದೆವು. ಸಿಮರೂಬ ದಿನದಿಂದ ದಿನಕ್ಕೆ ನಮಗೆ ಹೊಸಹೊಸ ಪಾಠಗಳನ್ನು ಕಲಿಸುತ್ತಾ ಹೋಯಿತು ಎಂದು ವಿವರಿಸುತ್ತಾರೆ ಶಾಂತಾ ಜೋಷಿ. ಶಾಂತಾ ಅವರು ಇದರ ವೈದ್ಯಕೀಯ ಮಹತ್ವದ ಬಗ್ಗೆ ಹಾಗೂ ಶ್ಯಾಮಸುಂದರ ಜೋಷಿ ಇದರ ಆರ್ಥಿಕ ಹಾಗೂ ಪರಿಸರ ಪ್ರಾಮುಖ್ಯತೆಯನ್ನು ಅಧ್ಯಯನ ಮಾಡುತ್ತ ಹೋದರು. ಜಿಕೆವಿಕೆ ಸುತ್ತಮುತ್ತ ಇರುವ ಹತ್ತು ಎಕರೆ ಜಾಗದಲ್ಲಿ 2000ಕ್ಕೂ ಅಧಿಕ ಸಿಮರೂಬ ಮರಗಳಿವೆ.


ವೈದ್ಯರಿಂದಲೇ ದೂರ ಇರಿ....

* ಪ್ರತಿ ಆರು ತಿಂಗಳಿಗೊಮ್ಮೆ 15 ದಿನಗಳ ಕಾಲ ದಿನಕ್ಕೆ ಮೂರಾವರ್ತಿ ಸಿಮರೂಬ ಕಷಾಯವನ್ನು ಸೇವಿಸಿದರೆ ಇಡೀ ಜೀವಮಾನ ವೈದ್ಯರಿಂದ ದೂರ ಇರಬಹುದು.
* ರಕ್ತಹೀನತೆ, ಮುಟ್ಟಿನ ಸಮಸ್ಯೆ, ರಕ್ತಸ್ರಾವವನ್ನು ತಡೆಗಟ್ಟಬಹುದು.
* ವಾಣಿಜ್ಯ ಬೆಳೆಯಾಗಿಯೂ ಇದನ್ನು ಬೆಳೆಸಬಹುದು. ಅತಿ ಬೇಗ ಬೆಳೆಯುತ್ತದೆ, 10ನೇ ವರ್ಷಕ್ಕೆ ಕತ್ತರಿಸಿ ಮರದ ನಾಟಾದಿಂದ ಪೀಠೋಪಕರಣ ತಯಾರಿಸಬಹುದು.
* ಮಧ್ಯ ಅಮೆರಿಕ ರಾಷ್ಟ್ರಗಳಲ್ಲಿ ಇದನ್ನು ನೂರಾರು ವರ್ಷಗಳಿಂದ ಅನೇಕ ಕಾಯಿಲೆಗಳಿಗೆ ಬಳಸುತ್ತಿದ್ದರು.
* ಸಿಮರೂಬ ಹಣ್ಣಿನ ತಿರುಳಿನಲ್ಲಿ ಶೇ.16ರಷ್ಟು ಸಕ್ಕರೆ ಅಂಶವಿದೆ. ಒಂದು ಮರದ ಹಣ್ಣುಗಳಿಂದ 20 ಲೀಟರ್ನಷ್ಟು ಜೂಸ್ ಮಾಡಬಹುದು.
* ಸಿಮರೂಬ ಬೀಜದಿಂದ ಶೇ.75ರಷ್ಟು ತೈಲವನ್ನು ತೆಗೆಯಬಹುದು. ಲ್ಯಾಟಿನ್ ಅಮೆರಿಕದಲ್ಲಿ ಇದನ್ನು ಮಂಟೆಕಾ ವೆಜಿಟಲ್ ನೀವ್ ಎಂದು ಕರೆಯುತ್ತಾರೆ. ಈ ಸಂಸ್ಕರಿತ ತೈಲ ಕೊಲೆಸ್ಟ್ರಾಲ್ ರಹಿತವಾಗಿದ್ದು ಉತ್ತಮ ಖಾದ್ಯ ತೈಲವೂ ಹೌದು.
* ಸಿಮರೂಬದಿಂದ ಬಯೋಡೀಸೆಲ್ ತಯಾರಿಕೆಯೂ ಸಾಧ್ಯ.
* ಒಟ್ಟಾರೆ ಇದರ ಎಲೆ, ಬೀಜ, ಹಣ್ಣು, ಬೀಜದ ತಿರುಳು, ಕಾಂಡ, ಚಕ್ಕೆ, ಬೇರು ಎಲ್ಲವೂ ಬಳಕೆಗೆ ಯೋಗ್ಯ.



ಉಳಿದ ಬದುಕು...
ಮೂರೂವರೆ ಸೆಂ.ಮೀ. ಟ್ಯೂಮರ್ ಗಡ್ಡೆ ಇದ್ದು ನಾಳೆ ಸರ್ಜರಿ ಟೇಬಲ್ ಮೇಲೆ ಮಲಗಬೇಕಿದ್ದ ಮಹಿಳೆಯೊಬ್ಬರು ಸಿಮರೂಬ ಚಿಕಿತ್ಸೆ ಆರಂಭಿಸುತ್ತಾರೆ. ಆರೇ ತಿಂಗಳಲ್ಲಿ ಅಚ್ಚರಿಯಾಗುವ ರೀತಿಯಲ್ಲಿ ಗಡ್ಡೆಯ ಕುರುಹೇ ನಾಪತ್ತೆಯಾಗಿದೆ. ಈಗವರು ಮಹಡಿ ಮನೆಯನ್ನು ಹತ್ತಿ ಇಳಿದು ಸರಾಗವಾಗಿ ಕೆಲಸ ಮಾಡುತ್ತಾರೆ. ಈ ಚಿಕಿತ್ಸೆಯ ಜತೆಗೆ ಅವರ ದೇಹದ ಪ್ರಮುಖ ಅಂಗವೊಂದು ಉಳಿದಿದೆ ಮತ್ತು ಅನೇಕ ಸಂಕೀರ್ಣ ಸಮಸ್ಯೆಗಳಿಂದ ಮುಕ್ತಿ ಪಡೆದಿದ್ದಾರೆ.
-ಡಾ ಶ್ಯಾಮಸುಂದರ ಜೋಷಿ, ಜಿಕೆವಿಕೆ ನಿವೃತ್ತ ಪ್ರೊಫೆಸರ್


ಸಿಮರೂಭದಲ್ಲಿರುವ ಪ್ರಮುಖ ರಾಸಾಯನಿಕಗಳು
ಕಾಸಿನೊಯ್ಡಗಳಾದ ಐಲಂಥಿನಾನ್, ಬೆಂನ್ಝೋಕ್ವಿನೋನ್, ಕ್ಯಾಂಥಿನ್, ಗ್ಲಾಕಾರುಬೈನ್, ಗ್ಲಾಕಾರುಬೊಲೋನ್, ಹೋಲೊಕ್ಯಾಂಥೋನ್, ಸಿಮರೂಬಿಡಿನ್, ಸಿಮರೊಲೈಡ್, ಸಿಮರೂಬಿನ್, ಸಿಮರೂಬೊಲೈಡ್, ಸಿಸ್ಟೋಸ್ಟೆರೋಲ್ ಮತ್ತು ಟಿರುಕಲ್ಲಾ.....


ಸಿಮರೂಬ ಗಿಫ್ಟ್  ಕೊಡಿ
ನಿಮ್ಮ ಮನೆಗೆ ಬಂದವರಿಗೆ ಒಂದು ಗಿಫ್ಟ್ ಕೊಡಬೇಕೆನಿಸಿದರೆ ಸಿಮರೂಬಗಿಡ ಕೊಟ್ಟು ಅದರ ಮಹತ್ವವನ್ನು ಹೇಳಿ. ಅದು ಮುಂದಿನ ತಲೆಮಾರಿಗೆ ನೀವು ಕೊಡುವ ಬಹುದೊಡ್ಡ ಕೊಡುಗೆಯಾಗುತ್ತದೆ ಎನ್ನುವುದನ್ನು ಮರೆಯದಿರಿ.


(ಹೀಗೆ ಸಿಮರೂಬದಿಂದ, ಡಾ.ಜೋಷಿ ಅವರಿಂದ ಚಿಕಿತ್ಸೆ ಪಡೆದು ಗುಣಮುಖರಾದವರಿದ್ದರೆ ಅವರು ಇಲ್ಲಿ ಅಭಿಪ್ರಾಯಗಳನ್ನು ಹಂಚಿಕೊಂಡರೆ ಉಳಿದವರಿಗೆ ಭರವಸೆ ಬಂದೀತು ಬದುಕಿನ ಮೇಲೆ....)

ಡಾ. ಶಾಮಸುಂದರ ಜೋಷಿ ಅವರ ದೂರವಾಣಿ ಸಂಖ್ಯೆ- 9448684021
ಆರ್.ಬಿ.ಐ. ಬಡಾವಣೆ, ಆನಂದನಗರ, ಆರ್.ಟಿ.ನಗರ, ಬೆಂಗಳೂರು. (ಆರ್.ಟಿ.ನಗರ ಸಾಯಿ ಮಂದಿರ ಬಳಿ)

ಡಿಸೆಂಬರ್ 15-2015ರ ಸಖಿಯಲ್ಲಿ ಪ್ರಕಟವಾಗಿರುವ ಲೇಖನ 



ಗುರುವಾರ, ಜುಲೈ 30, 2015

ಅವಳಿಗಳ ಮೋಹಕೆ ಕರಗಿದ ಪರ್ವತಗಳು!

ಅದು ಡೆತ್ ಝೋನ್!

ಪರ್ವತಾರೋಹಿಗಳು ಹಾಗೆಂದು ಅದನ್ನು ಕರೆಯುತ್ತಾರೆ. ಯಾವುದೇ ಪರ್ವತವಿರಲಿ, 26000 ಅಡಿಗಿಂತ ಆಚೆಗಿನ ಶಿಖರಾಗ್ರವೆಂದರೆ  ಯಾವತ್ತೂ ಸಾವಿನ ಸಹವಾಸ. ಎಂತಹ ಗಟ್ಟಿಗುಂಡಿಗೆ, ಕಬ್ಬಿಣದ ದೇಹವೂ ಅಲ್ಲಿನ ವಾತಾವರಣಕ್ಕೆ ಹೊಂದಿಕೊಳ್ಳುವುದಿಲ್ಲ. ಹನಿ ಆಮ್ಲಜನಕ ಸಿಕ್ಕರೂ ಸಾಕೆಂಬ ಸ್ಥಿತಿ. ಕಣ್ಣಿಗೆ ನಿದ್ದೆ ಹತ್ತುವುದಿಲ್ಲ. ತಿಂದ ಆಹಾರ ಜೀರ್ಣವಾಗುವುದಿಲ್ಲ. ಶ್ವಾಶಕೋಶವೇ ಊದಿಕೊಳ್ಳಲು ಶುರುವಾಗುತ್ತದೆ. ಯಾವುದೂ ನಿಮ್ಮ ಹತೋಟಿಗೆ ಸಿಕ್ಕುವುದಿಲ್ಲ. ಕೈ ಚಾಚಿದರೆ ನೀಲಾಕಾಶವೇ ಎಟಕುವಂತಿರುತ್ತದೆ, ಆದರೆ ಜೀವ ಹಿಡಿಹಿಡಿ. ಜೀವನದ ಅಂತಿಮ ಕ್ಷಣ ಕಣ್ಣಂಚಿಗೇ ಬಂದು ಕುಂತಂತೆ, ಅದು ಇನ್ನೇನು ಜಾರಿಯೇ ಬಿಟ್ಟಿತು ಎಂಬೋ ಭಾವ!

ಅದೊಂದೇ ಅಲ್ಲ, ಒಂದು ಶಿಖರದ ತುತ್ತತುದಿಗೇ ಏರಿ ಬಿಡಬೇಕೆಂದರೆ ನೇರಾ ನೇರ ಏಣಿ ಇಟ್ಟು ಹತ್ತುವಂತಾದ್ದಲ್ಲ. ಹತ್ತಾರು ಕಣಿವೆಗಳನ್ನು ದಾಟಬೇಕು, ಕಣ್ಣ ಮುಂದೇ ಕರಗಿ ಹೋಗುವ ನೀರ್ಗಲ್ಲುಗಳ ಬೆಟ್ಟಗಳ ನಡುವಲೊಂದು ಏಣಿ ಇಟ್ಟು ಮುಂದೆ ಕ್ರಮಿಸಬೇಕು. ಕೆಳಗೆ ಪ್ರಪಾತ, ಮೇಲಂತೂ ಕಣ್ಣೆತ್ತಿ ನೋಡುವ ಹಾಗೇ ಇಲ್ಲ. ಒಂದರ್ಥದಲ್ಲಿ ಅದೂ ಡೆತ್ ಝೋನ್!
ಅಂತಹ ಒಂದು ಪರ್ವತ ತುಂಗವನ್ನೇರಿ, ಕೊರಕಲುಗಳನ್ನು ದಾಟಿ ಬಂದು ನೋಡಿ, ಬದುಕು ಧನ್ಯವೆನ್ನುತ್ತದೆ. ಆದರೆ ಮತ್ತೆ ಮತ್ತೆ ಅಂತಹ ಡೆತ್ ಝೋನ್ಗಳನ್ನೇ ಕೆಣಕಿ ಬರುವುದಕ್ಕೆ ಎಂತಹ ಗುಂಡಿಗೆ ಬೇಕು ಹೇಳಿ? ಹಾಗೆ ಬೃಹತ್ ಹಿಮದ ಬುದ್ಭುದಗಳನ್ನು ಮೆಟ್ಟಿ, ನೂರಾರು ನೀರ್ಗಲ್ಲುಗಳನ್ನು ದಾಟಿ ಸಪ್ತ ಪರ್ವತಗಳನ್ನು ಏರಿ ಬಂದವರು ಈ ಹಾಲುಗಲ್ಲದ ಅವಳಿ ಸಹೋದರಿಯರು. ಅವರು ಎರಡು ಜೀವ ಒಂದೇ ದೇಹ ಎಂಬಂತಿರುವ ನುಂಗ್ಶಿ ಮತ್ತು ತಾಶಿ ಮಲ್ಲಿಕ್.

`ನಿಜ್ಜ, ಅಂತಹ ಅನೇಕ ಡೆತ್ ಝೋನ್ಗಳನ್ನು ಅಕ್ಷರಶಃ ಮುಟ್ಟಿ ಬಂದಿದ್ದೇವೆ. ಎವರೆಸ್ಟ್ ಶಿಖರವನ್ನು ಏರುವಾಗ ಖುಂಬು ಹಿಮದ ಮನೆಗಳನ್ನು ದಾಟಿ ಮುಂದೆ ಕ್ರಮಿಸಬೇಕು. ಒಂದು ಹೆಜ್ಜೆ ಇಟ್ಟರೆ ಅಲುಗಾಡುವ ಏಣಿಯ ಮೇಲೆ ಬ್ಯಾಲೆನ್ಸ್ ಮಾಡುತ್ತ ಹಿಮದ ಕಣಿವೆಗಳನ್ನು ದಾಟುವುದೆಂದರೆ ನಿಜಕ್ಕೂ ಸಾವಿನ ಕಣಿವೆಗಳನ್ನು ದಾಟಿದಂತೆ. ಇವನ್ನೆಲ್ಲ ಹೇಳಲಿಕ್ಕೆ ನಮ್ಮ ಬಳಿ ಪದವೇ ಸಿಗುವುದಿಲ್ಲ' ಎನ್ನುತ್ತಾರೆ ನುಂಗ್ಶಿ ಮಲ್ಲಿಕ್. ಖುಂಬು ನೀರ್ಗಲ್ಲ ಹಾದಿ ನಿಜಕ್ಕೂ ಸಾವಿನ ನಿತ್ಯ ದರ್ಶನ. ಆಗಸಕ್ಕೆ ಲಿಂಕ್ ಮಾಡಿಕೊಂಡಂತೆ ಹಿಮದ ರಾಶಿ. ವಿಶ್ವದಲ್ಲಿಯೇ ಅತ್ಯಂತ ವೇಗವಾಗಿ ಕರಗುವ ನೀರ್ಗಲ್ಲು ಯಾವಾಗ ಹಾಸಿಗೆಯಂತೆ ಮಗುಚಿಕೊಳ್ಳುತ್ತದೆ ಎಂಬುದು ಅರಿವಿಗೇ ಬರುವುದಿಲ್ಲ. ಹಾಗೇನಾದರೂ ಆಯಿತೋ ಅದರ ಕೆಳಗಿದ್ದವರು ಇರುವೆಗಳಿಗೆ ಸಮಾನ!

ಹಾಗಂತ, ಇಂತಹ ಹಾದಿಗಳನ್ನು ಕ್ರಮಿಸಲು, ಉತ್ತುಂಗವನ್ನು ಏರಲು ಪುರುಷರಷ್ಟೇ ಸಮರ್ಥರೇ? ಪರ್ವತಗಳಿಗೆಲ್ಲಿ ಲಿಂಗ ತಾರತಮ್ಯ? ಬೆಟ್ಟ ಹತ್ತೋ ಕೆಲ್ಸವನ್ನು ಹುಡ್ಗೀರು ಮಾಡಬಾರದು ಎಂಬುದಕ್ಕೆ ಸೆಡ್ಡು ಹೊಡೆದವರು ಈ ಅವಳಿಗಳು.  `ಊಂಚಾಯಿಯೋಂ ಸೆ ಆಗೇ' -ಉತ್ತುಂಗಕ್ಕಿಂತ ಆಚೆ ಏನಿದೆ ನೋಡೇ ಬಿಡೋಣ ಎಂದು ಹೊರಟ ಮಲ್ಲಿಕ್ ಸಹೋದರಿಯರಿಗೆ ಯಾವ ಶಿಖರಗಳೂ ಸಾಟಿಯಾಗಲಿಲ್ಲ. ಯಾವ ನೀರ್ಗಲ್ಲೂ ದೃತಿಗೆಡಿಸಲಿಲ್ಲ. ಕ್ರಮಿಸಿದ ಹಾದಿ, ಏರಿದ ಎತ್ತರ ಎಲ್ಲವೂ ದಾಖಲೆಯಾಗುತ್ತ ಹೋಯಿತು. ಕಳೆದ ಡಿಸೆಂಬರ್ನಲ್ಲಿ ಹಿಮದ ದಾರಿಯಲ್ಲಿ ಸ್ಕೀಯಿಂಗ್ ಮಾಡುತ್ತ ದಕ್ಷಿಣ ಧ್ರುವ ತಲುಪಿದವರು ಕೊನೆಗೆ ಮೊನ್ನೆ ಮೊನ್ನೆ ಉತ್ತರಧ್ರುವದಲ್ಲೂ ಭಾರತದ ಧ್ವಜ ನೆಟ್ಟು ಬಂದ ಮೊದಲ ಅವಳಿ ಸಹೋದರಿಯರು ಎಂಬ ಕೀತರ್ಿಗೂ ಭಾಜನರು.
ಕೇವಲ ಮೂರೇ ಮೂರು ವರ್ಷಗಳಲ್ಲಿ ಏಳು ಪರ್ವತಗಳನ್ನೇರಿದ 23 ವರ್ಷ ವಯಸ್ಸಿನ ದಿಟ್ಟೆಯರು ಹಿಮಾಲಯದ ಶಿಖರಾಗ್ರವನ್ನು ನೋಡುತ್ತಲೇ ಬೆಳೆದವರು. ಉತ್ತರಾಖಂಡ್ನ ಡೆಹ್ರಾಡೂನ್ನವರಾದ ಅವಳಿಗಳ ಬೇರುಗಳಿರುವುದು ಹರ್ಯಾಣದ ಹಳ್ಳಿಗಳಲ್ಲಿ. ಚಿಕ್ಕವರಿರುವಾಗಲೇ ಉತ್ತುಂಗವನ್ನೇರಬೇಕು ಎಂಬ ಕನಸು. ತಾರುಣ್ಯದ ಹೊತ್ತಿನಲ್ಲಿ ಅದು ಇನ್ನಷ್ಟು ಗಟ್ಟಿಯಾಯಿತು. ಕಿಲಿಮಂಜಾರೋ ಇರಲಿ ಎವರೆಸ್ಟ್ ಇರಲಿ, ಅದು ಎಷ್ಟೇ ಎತ್ತರಕ್ಕೇ ಬೆಳೆದಿರಲಿ, ನಾವಲ್ಲಿಗೇರಬೇಕು ಎಂಬ ವಾಂಛೆ. ತಂದೆ ಕರ್ನಲ್ ವಿರೇಂದ್ರ ಮಲ್ಲಿಕ್ ಯಾವುದನ್ನೂ ವಿರೋಸಲಿಲ್ಲ. ಶಾಲೆಯಾಚೆಗಿನ ಎಲ್ಲ ಆಟಗಳಿಗೂ ಸಮ್ಮತಿ ಎಂದರು. ಬೆಳಗಿನ ಐದಕ್ಕೇ ಎದ್ದು ದೇಹ ದಂಡನೆ ಮಾಡಲು ಅಪ್ಪನ ಶಿಸ್ತೇ ಪಾಠವಾಗಿತ್ತು. ಉತ್ತಮ ಅಥ್ಲೀಟ್ಗಳಾಗಿ ಬೆಳೆದರು. ಓಟದಲ್ಲಿ ಮುಂಚೂಣಿಯಲ್ಲಿದ್ದರು. ಅಮ್ಮ ವಾಕಿಂಗ್ಗೆಂದು ಹೊರಟರೆ ಅವರೊಂದಿಗೇ 15 ಕೆ.ಜಿ. ಭಾರ ಹೊತ್ತು ನಡೆಯುವ ತಾಲೀಮು ಮಾಡಿದರು. ಚಾರಣಕ್ಕೆ ಮನೆಯ ಪಕ್ಕದಲ್ಲೇ ಬೆಟ್ಟಗಳಿದ್ದವು. ಡೆಹ್ರಾಡೂನ್ನಲ್ಲಿ ಶಾಲಾ ದಿನಗಳನ್ನು ಕಳೆದ ಮಕ್ಕಳು ಮಾಡಿದ್ದು ಬಿಎ-ಜರ್ನಲಿಸಂ.
ಅಲ್ಲಿಂದ ಮುಂದಿನ ಪ್ರತಿಯೊಂದು ದಿನವೂ ಸವಾಲೇ. ಆದರೆ ಚಾರಣವೆಂಬ ಮೋಹ ಅವರ ರಕ್ತದೊಳಗೆ ಸೇರಿ ಹೋಗಿತ್ತು. ನುಂಗ್ಶಿ-ತಾಶಿ ಅವರ ಕಣ್ಣ ಮುಂದೆ ಬೃಹತ್ತಾಗಿ ನಿಂತಿದ್ದ ಜಗತ್ತಿನ ಪರ್ವತಗಳ ಸಾಲು ಕುಬ್ಜವಾದುವು. ಉತ್ತರಧ್ರುವ- ದಕ್ಷಿಣ ಧ್ರುವಗಳ ತುಂಬ ತುಂಬಿ ಹೋಗಿದ್ದ ಬೆಳ್ನೊರೆಯ ಹಿಮದ ಗುಡ್ಡೆಗಳು ಅವರ ಹಾಲು ಚೆಲ್ಲಿದ ನಗೆಯ ಮುಂದೆ ಹಾಲಿನಂತೆ ಕರಗಿ ಹೋದವು. ಕಾರಣವಿಷ್ಟೇ- ಜಸ್ಟ್ ಡೆಡಿಕೇಶನ್!
ಇವೆಲ್ಲದರ ಜತೆಗೇ ಒಂದು ಬಹುಮುಖ್ಯ ಸಂಗತಿ; ಇಬ್ಬರ ನಡುವಿನ ವೇವ್ಲೆಂಗ್ತ್. ಎಷ್ಟೋ ಬಾರಿ ಅಣ್ಣ-ತಮ್ಮಂದಿರು, ಅಕ್ಕ-ತಮ್ಮಂದಿರು, ಹೋಗ್ಲಿ ಗಂಡ-ಹೆಂಡತಿಯ ನಡುವೆ ಮಿಸ್ ಆಗೋದೇ ಈ ವೇವ್ಲೆಂಗ್ತ್. ಎರಡು ಹೃದಯ ಎಂದೂ ಹೊಂದಾಣಿಕೆಯಾಗದ ಸಂದರ್ಭಗಳೇ ನಮ್ಮ ಕಣ್ಣಿಗೆ ಕಾಣುತ್ತಿರುತ್ತದೆ. ಆದರೆ ನುಂಗ್ಶಿ ಮತ್ತು ತಾಶಿ ಎಂಬ ಅವಳಿಗಳ ಹೃದಯ ಸದಾ ಒಂದೇ ನುಡಿ, ಒಂದೇ ತುಡಿತ. ಇಬ್ಬರೂ ಬೇಸಿಕ್ ಮೌಂಟನೇರಿಂಗ್ ಕೋಸರ್್ ಮುಗಿಸಿ ಬಂದ ತಕ್ಷಣ ಯಸ್! ಇದೇ ನಮ್ಮ ಗುರಿ, ನಮ್ಮ ಛಲ ಎಂದುಕೊಂಡರು. ಅವಳಿಗಳಾಗಿರುವುದೇ ನಮಗಿರುವ ದೊಡ್ಡ ಶಕ್ತಿ ಎಂದು ಗೊತ್ತಾಗಿದ್ದೇ ಅವರು ಒಂದರ ಹಿಂದೆ ಒಂದರಂತೆ ಪರ್ವತಗಳನ್ನು ಹತ್ತತೊಡಗಿದಾಗ. ಪ್ರತಿ ಬಾರಿ ಪರ್ವತಗಳನ್ನು ಹತ್ತಲು ಅಡಿ ಇಟ್ಟಾಗಲೆಲ್ಲ ಅವರ ಕಣ್ಣಮುಂದೆ ಆದರ್ಶವಾಗಿದ್ದುದು ಎಡ್ಮಂಡ್ ಹಿಲರಿ-ತೇನ್ಸಿಂಗ್ ಜೋಡಿಯೇನೂ ಅಲ್ಲ, ಬದಲಾಗಿ ಇಟಲಿಯ ಪರ್ವತಾರೋಹಿ ರೀನ್ಹೋಲ್ಡ್ ಮೆಸ್ಸೆನರ್. ಈತ 8000 ಅಡಿಗಳಿಗೂ ಅಧಿಕ ಎತ್ತರದ ಹದಿನಾಲ್ಕು ಪರ್ವತಗಳನ್ನು ಏರಿದ ಸಾಹಸಿ, ಅದಷ್ಟೇ ಅಲ್ಲ. ಇಷ್ಟೂ ಪರ್ವತಗಳ ತುದಿಗೆ ತಲುಪಿದಾಗ ಆತನ ಬಳಿ ಯಾವುದೇ ಕೃತಕ ಆಮ್ಲಜನಕದ ಸಹಾಯವಿರಲಿಲ್ಲ!
ಹೇಳಿಕೇಳಿ ಈ ಅವಳಿಗಳು ಹುಟ್ಟಿದ್ದು ಹರಿಯಾಣದ ಹಳ್ಳಿಯಲ್ಲಿ. ಅಲ್ಲಿ ಗಂಡು ಸಂತಾನವೇ ಜೀವನದ ಸರ್ವಸ್ವ. ಹೆಣ್ಣುಮಕ್ಕಳೆಂದರೆ ಒಂದು ರೀತಿಯ ನಿರ್ಲಕ್ಷ. ಕರ್ನಲ್ ವೀರೇಂದ್ರ ಮಲ್ಲಿಕ್ ಹುಟ್ಟಿದ್ದೂ ನಾಲ್ಕು ಹೆಣ್ಣುಮಕ್ಕಳ ಬಳಿಕ. ಆದರೆ ವೀರೇಂದ್ರ ಅವರಿಗೆ ಮೊದಲ ಕೊಡುಗೆಯಾಗಿ ಸಿಕ್ಕಿದ್ದು ಈ ಅವಳಿ ಕುಡಿಗಳು. ಏನಾದರಾಗಲಿ ಇನ್ನೊಂದು ಗಂಡು ಸಂತಾನ ಬೇಕೇಬೇಕು ಎಂಬ ಜಿದ್ದಿಗೆ ಬಿದ್ದಿದ್ದರು ವೀರೇಂದ್ರ, ಆದರೆ ಎರಡೇ ವರ್ಷಗಳಲ್ಲಿ ಅವರ ನಿಧರ್ಾರ ಬದಲಾಗಿ ಬಿಟ್ಟಿತು. ಇನ್ನು ಮಕ್ಕಳೇ ಬೇಡ ಎಂದು ವಾಸೆಕ್ಟೆಮಿಗೆ ಒಳಗಾಗಿಬಿಟ್ಟರು. ಎರಡು ಹೆಣ್ಣು ಮಕ್ಕಳನ್ನು ಗಂಡು ಮಕ್ಕಳಂತೆ ಸಾಕಿದರು.
ಈ ದೇಶದ ಅನೇಕ ಹಳ್ಳಿಗಳಲ್ಲಿ ಈಗಲೂ ಗಂಡು ಸಂತಾನವೇ ಭವಿಷ್ಯದ ಬೆಳಕು ಎಂಬ ಗಟ್ಟಿ ನಂಬಿಕೆ. ನಿಜಕ್ಕೂ ಅದಲ್ಲ, ನಾವಿದ್ದೇವೆ ನೋಡಿ ಗಂಡುಗೋವಿಗಳಿಗೇ ಇಲ್ಲದ ಗಟ್ಟಿಗುಂಡಿಗೆ ಇರುವ ಹೆಣ್ಮಕ್ಕಳು ಎಂಬುದನ್ನು ಇಡೀ ಜಗತ್ತಿಗೆ ತೋರಿಸಿಕೊಟ್ಟವರು ಈ ಅವಳಿಗಳು. ಸಪ್ತ ಪರ್ವತಗಳ ಸಾಧನೆಯನ್ನು ಅವರು ಅರ್ಪಣೆ ಮಾಡಿರುವುದು ಕೂಡ ಭಾರತದ ಹೆಣ್ಣು ಮಗುವಿಗೆ!



 ಅವಳಿಗಳ ಸಪ್ತ ಪರ್ವತಗಳ ಚಾರಣ

ಕಿಲಿಮಂಜಾರೋ (19,341ಅಡಿ)-2012
ಎವರೆಸ್ಟ್ (29,029 ಅಡಿ)-2013
ಏಲ್ಬ್ರಸ್ (18,510 ಅಡಿ)-2013
ಅಕೊಂಗುವಾ  (22,841 ಅಡಿ)-2014
ಕಾರ್ಸ್ಟೆಂಝ್ ಪಿರಾಮಿಡ್ (16,024 ಅಡಿ)-2014
ಮೆಕ್ಕಿನ್ಲೇ (20,237 ಅಡಿ)- 2014
ವಿನ್ಸನ್ (16,050 ಅಡಿ)-2014


ಹೊಂಚು ಹಾಕುವ ಸಾವು! 
ಮೌಂಟ್ ಎವರೆಸ್ಟ್ ಏರುತ್ತ ಸಾಗಿದ ಹಾಗೆ ಸಾವಿನ ಭಯ ದಟ್ಟವಾಗುತ್ತ ಹೋಗುತ್ತದೆ. ಅದಕ್ಕೆ ಕಾರಣ ಹಿಂದೆ ಅದೇ ಹಾದಿಯಲ್ಲಿ ಹೋದ ಚಾರಣಿಗರ ಹೆಜ್ಜೆ ಗುರುತುಗಳು ಸಿಗುವುದಲ್ಲ, ಹೆಣಗಳು ಸಿಗುತ್ತವೆ. ಕೆಲ ದಿನಗಳ ಹಿಂದಷ್ಟೇ ರಾತ್ರಿಯೆಲ್ಲ ಜತೆಯಲ್ಲೇ ಕಾಫಿ ಕುಡಿದವರು, ಹರಟಿದವರು, ಭವಿಷ್ಯದ ಕನಸುಗಳ ಪಟ್ಟಿಯನ್ನು ಬಿಚ್ಚಿಟ್ಟವರು ನಮ್ಮ ಕಾಲಡಿಯಲ್ಲೇ ನಿಜರ್ೀವವಾಗಿದ್ದಾರೆ! ಉಸಿರೇ ನಿಂತು ಹೋಗುವ ಸ್ಥಿತಿ. ನುಂಗ್ಶಿ ಮತ್ತು ತಾಶಿಗೆ ಎವರೆಸ್ಟ್ ಹಾದಿಯಲ್ಲಿ ಸಿಕ್ಕ ಹೆಣಗಳ ಸಂಖ್ಯೆಯೇ ಹದಿನಾರು, ಬಹುತೇಕ ಎಲ್ಲರೂ ಸಹಚಾರಣಿಗರು! ಕ್ಷಣಕ್ಷಣವೂ ಹೊಂಚು ಹಾಕುವ ಸಾವನ್ನು ಮಣಿಸಲು ದೃಢಸಂಕಲ್ಪ ಬೇಕು. ಆಕಾಂಕ್ಷೆಗಳು ಅಪಾಯವನ್ನು ಮೆಟ್ಟಿ ನಿಲ್ಲಬೇಕು. ಮನುಷ್ಯನ ಸಾವಿರ ಸಾವಿರ ಸಾಮಥ್ರ್ಯವನ್ನು ಮೀರಿಸುವಷ್ಟು ದೈತ್ಯವಾಗಿರುವ ಪರ್ವತದ ಬಾಹು `ಹೆಣ್ಣು ಮಗು' ಎಂಬ ಲೆಕ್ಕವಿಟ್ಟುಕೊಳ್ಳುವುದಿಲ್ಲ.





ಸೋಮವಾರ, ಜೂನ್ 29, 2015

ಪ್ರಕೃತಿ ನೀಡುವ ಪ್ರತಿ ಹನಿಗೂ ಬೊಗಸೆಯೊಡ್ಡುವ ವಿಜ್ಞಾನಿ..!

ಪರಿಶುದ್ಧ ನೀರು, ಗಾಳಿ, ಶುಭ್ರ ವಾತಾವರಣ ಮತ್ತು ಪರಿಶುದ್ಧ ಮನಸ್ಸು ಇವುಗಳ ಬಗ್ಗೆ ಯೋಚಿಸುವುದೇ ಕ್ಲೀಷೆ ಅನ್ನಿಸುವಂತಹ ದಿನಗಳಿವು. ಕೆರೆಯನ್ನೇ ಮುಚ್ಚಿ ಮನೆಗಳನ್ನು ನಿರ್ಮಿಸುವ, ಬೆಟ್ಟವನ್ನೇ ಕಡಿದು ಬಂಗಲೆ ಕಟ್ಟುವವರ ನಡುವೆ ಇಂಥವರೂ ಇದ್ದಾರೆಯೇ ಎಂಬ ಅಚ್ಚರಿ ಕಾಡುತ್ತದೆ. ಯಾವ ಘೊಷಣೆಯೂ ಇಲ್ಲದೆ ಒಂದು ಸುಸ್ಥಿರ ಬದುಕಿಗೆ ಬೇಕಾದ ಎಲ್ಲವನ್ನೂ ಅಳವಡಿಸಿಕೊಂಡು, ಆಸ್ವಾದಿಸುತ್ತ ಬದುಕುವವರೂ ನಮ್ಮ ನಡುವೆ ಇದ್ದಾರೆ ಎಂಬುದಕ್ಕೆ ಸಾಕ್ಷಿ ಈ ವಿಜ್ಞಾನಿ. ಇವರ ಮನೆ, ಮನೆ ಕಟ್ಟಿಸಬೇಕೆನ್ನುವವರಿಗೊಂದು ಮಾದರಿ. ಒಬ್ಬ ಮನುಷ್ಯ ಪ್ರಕೃತಿಯನ್ನು ನಂಬುತ್ತಾ ಅದರೊಂದಿಗೇ ಲೀನವಾಗಿ ಹೇಗೆ ಜೀವಿಸಬಹುದು ಎಂಬುದಕ್ಕೆ ಈ ವಿಜ್ಞಾನಿಯ ಬದುಕೇ ಪಾಠ.

***
ವಿಜ್ಞಾನಿ ಶ್ರೀ ಎ.ಆರ್.ಶಿವಕುಮಾರ್
ಒಂದೇ ಒಂದು ಹನಿ ನೀರು ಅವರ ಮನೆಯಿಂದ ಆಚೆ ಹೋಗುವುದಿಲ್ಲ. ಜಲಮಂಡಳಿಯ ಸಂಪರ್ಕವೂ ಅವರ ಮನೆಗೆ ಇಲ್ಲ. ಪ್ಲಾಸ್ಟಿಕ್ ಬಿಟ್ಟರೆ ಒಂದು ಸಣ್ಣ ಕಸ, ವೇಸ್ಟ್ ಪೇಪರ್ ಕೂಡ ಮನೆಯಿಂದ ಆಚೆ ಹಾಕುವುದಿಲ್ಲ. ಅವರು ಬಳಸೋದು ಕೇವಲ ಶೇ. 25 ಬೆಸ್ಕಾಂ ವಿದ್ಯುತ್. ಉಳಿದಿದ್ದೆಲ್ಲ ಸೂರ್ಯನ ಬೆಳಕೇ. ಕುಡಿಯುವ ನೀರಿನ ಸಂಸ್ಕರಣೆಗೆ ದುಬಾರಿ ಮಷಿನ್ ಇಲ್ಲ. ಬೆಳಕೂ ಅಷ್ಟೇ; ದಿನದ ಯಾವುದೇ ಹೊತ್ತಿನಲ್ಲಿ ಮನೆಯ ಪ್ರತಿ ಮೂಲೆಯಲ್ಲೂ ಅದರ ತೋರಣ, ಬೆಳದಿಂಗಳು ಕೂಡ. ಅವರೇ ಟೊಂಕಕಟ್ಟಿ ಕಟ್ಟಿದ ಮನೆಗೆ ಈಗ ಬರೋಬ್ಬರಿ ಇಪ್ಪತ್ತು ವರ್ಷ. ಅತ್ಯಂತ ಕಡಿಮೆ ವೆಚ್ಚದಲ್ಲಿ ನಿರ್ಮಿಸಿದ ಈ ಮನೆ ಆಗಲೂ, ಈಗಲೂ, ಯಾವಾಗಲೂ ಸಂಪೂರ್ಣ ಸ್ವಾವಲಂಬಿ. ಮನೆಯಲ್ಲಿರುವ ಎಲ್ಲರೂ ದೃಢವಾಗಿ ನಂಬಿದ್ದು ಒಂದನ್ನೇ-ಅದು ಪ್ರಕೃತಿ.
ಶಿವಕುಮಾರ್ ಅವರ ಮನೆ ಸೌರಭದೊಳಗೆ ಚೆಂದ ನೋಟ
ಈ ವಿಜ್ಞಾನಿಯ ಮನೆಗೊಂದು ಸುತ್ತುಹಾಕಿ ಈಚೆ ಬಂದರೆ ಒಂದು ದೊಡ್ಡ ಗಿಲ್ಟ್ ನಮ್ಮನ್ನು ಕಾಡುತ್ತದೆ. ನಿಜಕ್ಕೂ ನಾವು ಎಷ್ಟೊಂದು ಪರಾವಲಂಬಿಗಳಲ್ಲವೆ? ಪರಿಸರ ರಕ್ಷಣೆಯ ಕುರಿತು ಘೊಷಣೆಗಳನ್ನೆಲ್ಲ ಬದಿಗಿಟ್ಟು ಸೀದಾಸಾದಾ ಹೀಗೆ ಬದುಕಬಹುದಾ? ಎಂಬ ಪ್ರಶ್ನೆಗೆ ಸರಳ ಉತ್ತರ ಎ. ಆರ್. ಶಿವಕುಮಾರ್. ಯಾವುದೇ ಬಿಗುಮಾನ, ಭಿಡೆ ಇಲ್ಲದೆ ತೆರೆದ ಪುಟದಂತಿರುವ ಇವರೊಂದಿಗೆ ಒಂದು ದಿನ ಕಳೆದುಬಿಟ್ಟರೆ ಸಾಕು ಎಷ್ಟೋ ಸಂಕೀರ್ಣ ಸಂಗತಿಗಳಿಂದ ಮುಕ್ತರಾಗುತ್ತೇವೆ. ಪ್ರತಿ ಮನೆ ಕಟ್ಟುವಾಗಲೂ ಬೋರ್​ವೆಲ್ ಕೊರೆಯಲೇಬೇಕಾ? ದುಬಾರಿ ಸಾಮಗ್ರಿಗಳನ್ನು ಬಳಸಬೇಕಾ? ಹತ್ತು-ಹನ್ನೆರಡು ಪಿಲ್ಲರ್​ಗಳನ್ನು ಎತ್ತರಕ್ಕೆ ನಿರ್ಮಿಸಬೇಕಾ? ಒಳಗೊಂದು ಹೊರಗೊಂದು ಪೇಂಟ್ ಬಳಿದು ಕನ್​ಪ್ಯೂಸ್ ಆಗಬೇಕಾ ಎಂಬ


ಸೌರಭದ ಮುಂಭಾಗ


ಮೂಲ ಅಂಶಗಳಿಗೇ ಪರಿಹಾರ 
ಕಂಡುಕೊಳ್ಳಲು ಸಾಧ್ಯವಾಗುತ್ತದೆ.

ಶಿಲೆಕಲ್ಲುಗಳಿಂದಲೇ ಕಟ್ಟಿದ ಮನೆ
ಬೆಂಗಳೂರಿನ ವಿಜಯನಗರದ ಬಸವೇಶ್ವರ ಬಡಾವಣೆಯಲ್ಲಿ ಅವರು 20 ವರ್ಷಗಳ ಹಿಂದೆ 40X60 ಜಾಗದಲ್ಲಿ ಮನೆ ಕಟ್ಟಲು ಯೋಚಿಸಿದಾಗ ಅಲ್ಲಿ ನೀರಿನ ಸಂಪರ್ಕವೇ ಇರಲಿಲ್ಲ. ಆಗ ಶಿವಕುಮಾರ್, ಕಳೆದ 100 ವರ್ಷಗಳಲ್ಲಿ ಬಿದ್ದ ಮಳೆಯ ಲೆಕ್ಕಾಚಾರ ಹಾಕುತ್ತಾರೆ. ಈ ಪ್ರದೇಶದಲ್ಲಿ ಅಪಾರ ಪ್ರಮಾಣದ ಮಳೆ ಬಿದ್ದ ಲೆಕ್ಕ ಸಿಗುತ್ತದೆ. ಆಗಲೇ, ‘ಪ್ರತಿ ಹನಿಯೂ ನನಗೆ ಬೇಕುಅನ್ನುವ ಹಠಕ್ಕೆ ಬೀಳುತ್ತಾರೆ. ಇವರಿಗೆ ಪೂರ್ತಿಗೆ ಪೂರ್ತಿ ಸಾಥ್ ಕೊಟ್ಟವರು ಪತ್ನಿ ಸುಮಾ. ಇಬ್ಬರೂ ಮೊದಲು ಮಾಡಿದ ಕೆಲಸವೆಂದರೆ ಬಿದ್ದ ಮಳೆನೀರು ಒಂಚೂರೂ ಆಚೆ ಹೋಗದಂತೆ ಸಂಗ್ರಹಿಸುವ ಕಾಯಕ. ಹಾಗೆ ಅವರ ಮಳೆಪಾತ್ರೆಗೆ ಬಂದು ಬಿದ್ದಿದ್ದು  ಬರೋಬ್ಬರಿ 30 ಸಾವಿರ ಲೀಟರ್ ಮಳೆನೀರು! ಒಂದೇ ಒಂದು ಹನಿ ನೀರನ್ನು ಹೊರಗಿನಿಂದ ತರದೆ, ಬೋರ್​ವೆಲ್ ಕೂಡ ಉಪಯೋಗಿಸದೆ ಇಡೀ ಮನೆ ಮಳೆನೀರಿನಲ್ಲೇ ನಿರ್ಮಾಣಗೊಳ್ಳುತ್ತದೆ. ಹಾಗೆ ಕಟ್ಟಡ ಮೇಲೆದ್ದಾಗ ಸುತ್ತಮುತ್ತಲ ಬಡಾವಣೆಯವರೆಲ್ಲ ಅಚ್ಚರಿಪಟ್ಟಿದ್ದರು - ಕೇವಲ ಮಳೆನೀರಿನಿಂದ ಇಷ್ಟು ದೊಡ್ಡ ಮನೆ (ಸೌರಭ) ಕಟ್ಟಲು ಸಾಧ್ಯವೆ ಎಂದು. ಒಂದು ಪೂರ್ವ ಯೋಜನೆ, ಮಾಡಲೇಬೇಕು ಎಂಬ ದೃಢಸಂಕಲ್ಪವಿದ್ದರೆ ಸಾಧ್ಯ ಎಂಬುದಕ್ಕೆ ಅವರ ಮನೆಯೇ ಉದಾಹರಣೆ

.ಅವರ ಮನೆ ಸೌರಭದ ನೆಲಮಹಡಿಯ ಮೇಲ್ಛಾವಣಿಯ ಮೇಲ್ಭಾಗದಲ್ಲಿ 5 ಸಾವಿರ ಲೀಟರ್ ಸಾಮರ್ಥ್ಯದ ಟ್ಯಾಂಕ್​ ಇದೆ. ಅದಕ್ಕೆ ಮಳೆನೀರು ಹರಿಯುತ್ತದೆ, ಅದರೊಳಗೇ ಅಳವಡಿಸಿರುವ ವಿಶೇಷ ವಿನ್ಯಾಸದ ಸ್ಟೆಬಿಲೈಸೇಷನ್ ತೊಟ್ಟಿಯ ಮೂಲಕ ಒಳಹರಿಯುವ ನೀರು ಪಾಪ್-ಅಪ್ ಫಿಲ್ಟರ್​ನಲ್ಲಿ ಪರಿಶೋಧನೆಗೆ ಒಳಗಾಗುತ್ತದೆ. ಈ ಟ್ಯಾಂಕ್ ಮೇಲ್ಭಾಗದಲ್ಲಿಯೇ ಇರುವುದರಿಂದ ನೀರನ್ನು ಪಂಪ್ ಮಾಡಬೇಕಾದ ಅಗತ್ಯವಿರುವುದಿಲ್ಲ. ಹಾಗಾಗಿ ವಿದ್ಯುತ್ ಬಳಕೆ ಅಗತ್ಯವಿಲ್ಲ.
ಮೊದಲ ಮಹಡಿಗೆ ತಾಕಿಕೊಂಡಿರುವ ಮಳೆ ನೀರಿನ ಟ್ಯಾಂಕ್
ಮೇಲ್ಭಾಗದ ಟ್ಯಾಂಕ್​ನಲ್ಲಿ ಸಂಗ್ರಹವಾಗುವ ಹೆಚ್ಚುವರಿ ನೀರನ್ನು ಮನೆಯ ಮುಂಭಾಗದ ಸಂಪ್​ಗೆ ಹರಿಸಲಾಗುತ್ತದೆ. ಇದರ ಸಾಮರ್ಥ್ಯ 25 ಸಾವಿರ ಲೀ. ಇಲ್ಲಿಂದ ಪಕ್ಕದ ಗ್ಯಾರೇಜ್ ತಳಭಾಗದಲ್ಲಿರುವ ಸಂಪ್​ಗೆ 10 ಸಾವಿರ ಲೀ. ಸೈಫನ್ ಆಗುತ್ತದೆ. ಇವೆರಡೂ ತೊಟ್ಟಿಗಳಲ್ಲಿ ಹೆಚ್ಚಾದ ನೀರನ್ನು ಅಂತರ್ಜಲ ಪುನಶ್ಚೇತನಕ್ಕೆ ಬಳಸಿಕೊಳ್ಳಲಾಗುತ್ತದೆ. ಅದಕ್ಕಾಗಿ ನೆಲದಾಳದಲ್ಲಿ 4 ಹಳೆಯ ಡ್ರಮ್ಗಳನ್ನು ಒಂದಕ್ಕೊಂದು ಜೋಡಿಸಿ ಇಂಗುಗುಂಡಿ ವ್ಯವಸ್ಥೆ ಮಾಡಲಾಗಿದೆ. ಇಷ್ಟೆಲ್ಲ ಆಗಿಯೂ ಮಳೆನೀರು ಮಿಕ್ಕಿದಾಗ ಅವರು ಅನಿವಾರ್ಯವಾಗಿ ಕೇವಲ 80 ಅಡಿ ಆಳದ ಬೋರ್​ವೆಲ್ ಕೊರೆಸಿ ಅಲ್ಲಿ ಅಂತರ್ಜಲ ಮರುಪಾವತಿಗೆ ವ್ಯವಸ್ಥೆ ಮಾಡಿದ್ದಾರೆ. ಅಂದರೆ ತಾವೇ ನಿರ್ಮಿಸಿಕೊಂಡ ಒಟ್ಟು 45 ಸಾವಿರ ಲೀ. ಜಲಾಗಾರ ಹಾಗೂ ಮರುಪೂರಣಗೊಂಡ ಜಲಸಾಗರದ ಒಡೆಯ ಶಿವಕುಮಾರ್.
ವಿಜ್ಞಾನಿ ಶಿವಕುಮಾರ್ ಅವರ ಬೊಗಸೆಯಲ್ಲಿ "ಭೂಜೀವಿ' 
ಇದರಿಂದಾಗಿ ವರ್ಷದ ಅಷ್ಟೂ ದಿನ ಸಮೃದ್ಧ ನೀರು. ಪ್ರತಿಯೊಂದಕ್ಕೂ ಮಳೆನೀರೇ ಆಶ್ರಯ. ಪಾತ್ರೆ, ಬಟ್ಟೆ ತೊಳೆದ ನೀರೂ ಪುನರ್​ಬಳಕೆಯಾಗುತ್ತದೆ. ಬಟ್ಟೆ ವಾಶ್ ಮಷಿನ್​ನಿಂದ ಬಂದ ನೀರೆಲ್ಲವೂ ಭೂತಳದಲ್ಲಿರುವ ಇನ್ನೊಂದು ಟ್ಯಾಂಕ್​ನಲ್ಲಿ ಸಂಗ್ರಹವಾಗುತ್ತದೆ. ಸೌರವಿದ್ಯುತ್ ಸಂಪರ್ಕದ ಪುಟ್ಟ ಪಂಪ್ ಕೊಳೆನೀರನ್ನು ಟೆರೇಸ್ ಮೇಲಿರುವ ಎರಡು ಪುಟಾಣಿ ಡ್ರಮ್ಳಿಗೆ ಸರಬರಾಜು ಮಾಡುತ್ತದೆ. ಅಲ್ಲಿ ಅದು ಸಂಸ್ಕರಣೆಗೊಳ್ಳುತ್ತದೆ. ಹೇಗೆ? ಸಿಂಪಲ್, ಅದರಲ್ಲಿ ಆಳೆತ್ತರದ ಜೊಂಡು, (ಹುಲ್ಲು, ವಿಟುವೆರಾ) ಬೆಳೆಯಲಾಗಿದೆ. 
ಸೋಪ್ ನೀರನ್ನು ಶುದ್ಧಗೊಳಿಸುವ ವಿಟುವೆರಾ ಹುಲ್ಲು
ಅದರ ಬೇರುಗಳಲ್ಲಿ ನೀರು ಸಂಸ್ಕರಣೆಗೊಂಡು ಇನ್ನೊಂದು ಪ್ರತ್ಯೇಕ ಟ್ಯಾಂಕ್​ಗೆ ಪೂರೈಕೆಯಾಗುತ್ತದೆ. ಅದನ್ನು ಮತ್ತೆ ಟಾಯ್ಲೆಟ್ ಫ್ಲಶ್​ಗೆ ಉಪಯೋಗಿಸುತ್ತಾರೆ. ಅಡುಗೆಮನೆಯಲ್ಲಿ ತರಕಾರಿ, ಪಾತ್ರೆ ತೊಳೆದ ನೀರು ಮನೆಯ ಸುತ್ತಲೂ ಇರುವ ಗಿಡಗಳಿಗೆ ಭರಪೂರ ಸಾಕು. ಅಂದರೆ ಅಷ್ಟೂ ಜಾಗದಲ್ಲಿ ಬಿದ್ದ ಮಳೆ ಪುನರ್ಬಳಕೆಯಾಗಿ ಮತ್ತೆ ಮತ್ತೆ ನಿಮ್ಮ ಬೊಗಸೆಗೆ ಬರುವುದು ವಿಶೇಷ.
ಅನೇಕ ಕಡೆ ನೀರಿನ ತೀವ್ರ ಬಿಕ್ಕಟ್ಟು, ಕುಡಿಯಲಿಕ್ಕೇ ನೀರಿಲ್ಲ ಎಂಬುದನ್ನು ಓದುತ್ತಿರುತ್ತೇವೆ. ಆದರೆ ಮಳೆನೀರಿಗಿಂತ ಪರಿಶುದ್ಧವಾದದು ಬೇರಿನ್ನಾವುದೂ ಇಲ್ಲ. ಈ ಬಿಕ್ಕಟ್ಟಿಗೆ ನಿಸರ್ಗದಲ್ಲೇ ಉತ್ತರವಿದೆ ಎಂಬುದನ್ನು ನಾವು ಗಮನಿಸುವುದೇ ಇಲ್ಲಎನ್ನುವ ಶಿವಕುಮಾರ್ ಕೊಡುವ ಮಳೆಯ ಲೆಕ್ಕಾಚಾರವನ್ನು ಒಮ್ಮೆ ಗಮನಿಸಿ; ಬೆಂಗಳೂರಿಗೆ ವರ್ಷವಿಡೀ ಅಂದಾಜು 1000 ಮಿ.ಮೀ. ಮಳೆ ಬೀಳುತ್ತದೆ. 2400 ಚದರಡಿ ವಿಸ್ತೀರ್ಣದ ನಿವೇಶನಕ್ಕೆ ಅಂದಾಜು 2.23 ಲಕ್ಷ ಲೀಟರ್ ಮಳೆ ಬೀಳುತ್ತದೆ. ಒಂದು ಮನೆಯ ಬಳಕೆಗೆ ವಾರ್ಷಿಕ ಬೇಕಾದುದು 1.5 ಲೀ.ನಿಂದ 1.8 ಲಕ್ಷ ಲೀ. ಮಾತ್ರ. ಅಂದರೆ ಇನ್ನೂ ಹೆಚ್ಚುವರಿ ನೀರು ಉಳಿದುಕೊಳ್ಳುತ್ತದೆ. ಯಾಕೆ ಬೇಕು ಹೊರಗಿನಿಂದ ನೀರು? ಬೋರ್​ವೆಲ್ ಕೊರೆಯುವ ಉಸಾಬರಿ?
ಮಳೆ ನೀರು ಫಿಲ್ಟರ್ ಆಗುತ್ತದೆ ಇಲ್ಲಿ...
***
ಸೂರ್ಯನನ್ನು ನಂಬಿ
ಬರೀ ಮಳೆನೀರಿಗಷ್ಟೇ ಈ ವಿಜ್ಞಾನಿಯ ಆಸಕ್ತಿ ನಿಲ್ಲುವುದಿಲ್ಲ. ಅವರ ಮನೆಯ ತಿಂಗಳ ವಿದ್ಯುತ್ ಬಳಕೆ 90ರಿಂದ 100 ಯೂನಿಟ್ ಮಾತ್ರ. ಅದೂ ಮಿಕ್ಸಿ, ಟಿವಿ ಮತ್ತು ಪಂಪ್ ಬಳಕೆಗೆ ಸೀಮಿತ. ಬೆಳಕು, ಶಾಖಕ್ಕೆಲ್ಲ ಅವರು ನಂಬಿದ್ದು ಸೂರ್ಯನನ್ನು. ಮನೆಯ ಮೇಲ್ಛಾವಣಿಯಲ್ಲಿ ಸೋಲಾರ್ ಪ್ಯಾನೆಲ್ ಇದೆ, ಅದಕ್ಕೆ ಬೇಕಾದ ಬಿಡಿಭಾಗಗಳನ್ನೆಲ್ಲ ಖರೀದಿಸಿ ಪೂರ್ತಿ ಪ್ಯಾನೆಲ್ ಜೋಡಿಸಿದ್ದೂ ಸ್ವತಃ ಶಿವಕುಮಾರ್. ಮನೆಯ ಬಹುತೇಕ ಭಾಗಗಳಲ್ಲಿ ಇರುವುದು ಎಲ್​ಇಡಿ ಲೈಟುಗಳೇ. ಮನೆಯ ಒಂದು ಭಾಗದ ಮೇಲ್ಛಾವಣಿಯ ನಡುವಿನಲ್ಲಿ ಗಾಜುಗಳನ್ನು ಅಳವಡಿಸಲಾಗಿದೆ. ಎಲ್ಲಿ ಬೆಳಕು ಹರಿಯುವುದಿಲ್ಲವೋ ಅಲ್ಲಿಗೆ ಪ್ರತಿಬಿಂಬ ಬೀಳುವ ರೀತಿಯಲ್ಲಿ ನಾಲ್ಕು ಕಡೆ ಕನ್ನಡಿ ಜೋಡಿಸಲಾಗಿದೆ. ಇದರಿಂದ ಮನೆಯ ಮೂಲೆ ಮೂಲೆಗೂ ಬೆಳಕಿನ ಕಾರಂಜಿ ಹರಿಯುತ್ತದೆ. ಹಾಲು ಸುರಿವ ಬೆಳಂದಿಗಳ ದಿನಗಳಲ್ಲಿ ಸಿಗುವ ಆನಂದಕ್ಕಂತೂ ಎಣೆಯಿಲ್ಲ.
ಸೌರಭದ ಮೇಲ್ಛಾವಣಿಯಿಂದ ಬೆಳಕು ಸುರಿವ ಬಗೆ ಹೀಗಿದೆ...
ಘನತ್ಯಾಜ್ಯವನ್ನು ಬಿಟ್ಟು ಪೇಪರು, ತರಕಾರಿ, ಹಣ್ಣು, ಉಳಿದೆಲ್ಲ ತ್ಯಾಜ್ಯವನ್ನು ಎರೆಹುಳುಗಳು ತಿಂದು ಮುಗಿಸುತ್ತವೆ. ಹಾಗೆ ಉತ್ಪತ್ತಿಯಾದ ಗೊಬ್ಬರವನ್ನು ಮನೆಯ ಸುತ್ತಲೂ ಇರುವ ಕೈತೋಟಗಳಿಗೆ ಬಳಸಿಕೊಳ್ಳುತ್ತಾರೆ. ಉಳಿದಿದ್ದು ನೆರೆಹೊರೆಯವರಿಗೂ ಸಲ್ಲುತ್ತದೆ. ಅವರ ಮನೆಯ ಸುತ್ತಲೂ ಇವೆ ಗಿಡ-ಮರಗಳು, ಮೀನಿನ ಕೊಳಗಳು. ಅದು ಮನೆಯ ಮೇಲ್ಛಾವಣಿಗೂ ವಿಸ್ತರಿಸಿದೆ. ಹಾಗಾಗಿ ಹಕ್ಕಿ-ಪಕ್ಕಿಗಳು, ಪಾತರಗಿತ್ತಿಗಳು ನಿರಂತರ ಅತಿಥಿಗಳು. ಇದರಿಂದ ಮನೆ ಸುತ್ತ ಯಾವತ್ತೂ ತೇವಾಂಶವನ್ನು ಕಾಯ್ದಿಟ್ಟುಕೊಳ್ಳಲು ಸಾಧ್ಯವಾಗುತ್ತದೆ. ಜೊತೆಗೆ ಧೂಳು, ಬಿಸಿಗಾಳಿ ಮನೆಯೊಳಗೆ ಸುತಾರಾಂ ಪ್ರವೇಶ ಮಾಡುವುದಿಲ್ಲ. ಎಲ್ಲಕ್ಕಿಂತ ವಿಶೇಷವೆಂದರೆ ಮನೆಯ ಮೇಲ್ಛಾವಣಿಗೆ ಸುಣ್ಣ ಬಳಿದಿರುವುದು! ಹಾಗೆ ಮಾಡಿರುವುದರಿಂದ ಸೂರ್ಯನ ಶಾಖ ಒಳಪ್ರವೇಶ ಮಾಡುವುದಿಲ್ಲ. ಒಟ್ಟಾರೆ ಇಡೀ ಮನೆ ತಣ್ಣಗೆ.
ಮನೆಯ ಮೇಲೆ, ಆಚೀಚೆ ಎಲ್ಲೆಲ್ಲೂ ಹಸಿರು ತೋರಣ
ಪಿಲ್ಲರ್ ಇಲ್ಲ
ಇಪ್ಪತ್ತು ವರ್ಷಗಳ ಹಿಂದೆ 1800 ಚದರಡಿಯ ಮನೆಗೆ ತಗುಲಿದ ವೆಚ್ಚ ತೀರಾ ಕಡಿಮೆ. ಪ್ರತಿಹಂತದಲ್ಲಿಯೂ, ಪ್ರತಿ ಸಾಮಗ್ರಿ ಬಳಕೆಯಲ್ಲೂ ಎಚ್ಚರಿಕೆ ವಹಿಸಲಾಗಿದೆ. ಅಡಿಪಾಯಕ್ಕೆ ಬಳಸಿದ ಶಿಲೆಕಲ್ಲುಗಳನ್ನು ಅದೇ ರೂಪದಲ್ಲಿ, ಡ್ರೆಸ್ ಕೂಡ ಮಾಡದೆ ಗೋಡೆಗೂ ಬಳಸಿಕೊಳ್ಳಲಾಗಿದೆ. ಕೆಲ ಗೋಡೆಗಳಿಗೆ ಇಟ್ಟಿಗೆಗಳನ್ನು ಇಲಿ ಬೋನಿನ ರೂಪದಲ್ಲಿ ಕಟ್ಟಲಾಗಿದೆ; ಮಧ್ಯದಲ್ಲಿ ಜಾಗ ಬಿಡಲಾಗಿದೆ. ಇದರಿಂದ ಮನೆಯೊಳಗೆ ಸದಾ ತಂಪು ತಂಪು, ಮಾತ್ರವಲ್ಲ ಒಟ್ಟಾರೆ ವೆಚ್ಚವನ್ನೂ ತಗ್ಗಿಸುತ್ತದೆ. ಇದು ಹೊಸ ಮಾದರಿಯಲ್ಲವೇ ಎಂದು ಅವರನ್ನು ಪ್ರಶ್ನಿಸಿದರೆ; ‘ಇಲ್ಲ ಸರ್, ಇದು ಹೊಸತಲ್ಲ. ಇಡೀ ಯುರೋಪನ್ನು ಕಟ್ಟಿದ್ದು ಇದೇ ಮಾದರಿಯಲ್ಲಿ, ನಾವು ಅಳವಡಿಸಿಕೊಂಡಿಲ್ಲ ಅಷ್ಟೆಅನ್ನುವ ಉತ್ತರ ಅವರಿಂದ ಬರುತ್ತದೆ. ಇಷ್ಟೆಲ್ಲ ಇರುವ ಮನೆ ವಾಸ್ತುಪ್ರಕಾರ ಕಟ್ಟಲಾಗಿದೆಯೇ? ‘ಖಂಡಿತ ಇಲ್ಲ, ನಮ್ಮ ಮನೆ ವಿಜ್ಞಾನದ ಪ್ರಕಾರ ಕಟ್ಟಿರುವುದು, ಬಿಸಿಲು, ಗಾಳಿ, ನೀರನ್ನು ನಂಬಿದ ವಿಜ್ಞಾನಎಂದು ನಗುತ್ತಾರೆ. ಇಷ್ಟು ದೊಡ್ಡ ಮನೆಗೆ ಆಧಾರವಾಗಿ ಒಂದೇ ಒಂದು ಪಿಲ್ಲರ್ ಕೂಡ ಇಲ್ಲ!
ಮನೆಯ ಕೆಳಗೆ ಜಲಸಾಗರ, ಮೇಲೆ ಸೌರ ಭಂಡಾರ, ಸುತ್ತಲೂ ಹಸಿರ ತೋರಣ! ಒಬ್ಬ ಮನುಷ್ಯ ತನ್ನ ಸುತ್ತಲೂ ಸುಸ್ಥಿರ ಬದುಕಿನ ಪ್ರಭಾವಳಿಯನ್ನು ನಿರ್ಮಿಸಿಕೊಳ್ಳುವುದೆಂದರೆ ಇದೇ ಅಲ್ಲವೇ? ಈಗ ಅವರ ಮನೆಯ ಹೊರಗೆ ಮಳೆ ಸುರಿಯುತ್ತಿದೆ; ಶಿವಕುಮಾರ್ ಅವರ ಇಡೀ ಕುಟುಂಬ ಸುಗ್ಗಿಯ ಸಂಭ್ರಮದಲ್ಲಿದೆ.
***
ಏಳು ವಿವಿಧ ಪೇಟೆಂಟ್​ಗಳು
ಮೈಸೂರು ವಿವಿಯಲ್ಲಿ ಬಿಇ ಮಾಡಿರುವ ಶಿವಕುಮಾರ್ ಭಾರತೀಯ ವಿದ್ಯಾಭವನದಲ್ಲಿ ಬಿಜಿನೆಸ್ ಮ್ಯಾನೇಜ್​ವೆುಂಟ್​ನಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಇಂಡಿಯನ್ ಇನ್​ಸ್ಟಿಟ್ಯೂಟ್ ಆಫ್ ಸೈನ್ಸ್​ನಲ್ಲಿ ಹಣಕಾಸು ನಿರ್ವಹಣಾ ಪ್ರೊಫೀಸಿಯನ್ಷಿ ಕೋರ್ಸ್ ಮಾಡಿರುವ ಇವರು ಸದ್ಯ ಕರ್ನಾಟಕ ರಾಜ್ಯ ವಿಜ್ಞಾನ ಮತ್ತು ತಂತ್ರಜ್ಞಾನ ಮಂಡಳಿಯಲ್ಲಿ ಪ್ರಧಾನ ಸಂಶೋಧಕರು ಹಾಗೂ ವಿಜ್ಞಾನಿ. ಟೈಮ್ ಫೋರ್ಬ್ಸ್ ಪತ್ರಿಕೆಗಳಲ್ಲೂ ಇವರ ಬಗೆಗಿನ ಲೇಖನಗಳು ಪ್ರಕಟವಾಗಿವೆ. ವಿಧಾನಸೌಧ, ವಿಕಾಸಸೌಧ, ಬೆಂಗಳೂರಿನ ಪಾಲಿಕೆ ಕಟ್ಟಡ, ಹೈಕೋರ್ಟ್ ಸೇರಿದಂತೆ ಬೆಂಗಳೂರಿನ ಪ್ರಮುಖ ಹತ್ತು ಕಟ್ಟಡಗಳು ಸಂಪೂರ್ಣ ಮಳೆಕೊಯ್ಲನ್ನು ಅಳವಡಿಸಿಕೊಳ್ಳಲು ಸಾಧ್ಯವಾಗಿದ್ದು ಶಿವಕುಮಾರ್ ಅವರಿಂದ. ಇದಲ್ಲದೇ ಇನ್ಪೋಸಿಸ್, ಬಾಷ್, ಮೆಟ್ರೋ ರೈಲಿನಲ್ಲಿ ಕತ್ತಾಳೆ (ಭೂತಾಳೆ) ಎಲೆಯಿಂದ ಫೈಬರ್ ತೆಗೆಯುವ ಯಂತ್ರ ಸೇರಿದಂತೆ ಏಳು ಸಂಶೋಧನೆಗಳಿಗೆ ಪೇಟೆಂಟ್​ಗಳನ್ನು ಹೊಂದಿರುವುದೂ ಅವರ ವಿಶೇಷ. ಲೋವಾಲ್ಟ್ ಹೈ ಎಫೀಸಿಯನ್ಸಿ ವಾಟರ್ ಹೀಟರ್ ಕಂಡುಹಿಡಿದ ಇವರಿಗೆ 2002ರಲ್ಲಿಯೇ ರಾಷ್ಟ್ರಪ್ರಶಸ್ತಿ ಸಂದಿದೆ.
***
ವಿಧಾನ ಬೆಳ್ಳಿ, ನೀರು ಬಂಗಾರ
ಈ ಶುದ್ಧೀಕರಣ ಮುಂದೆ ಇನ್ಯಾವ ಅಕ್ವಾಗಾರ್ಡ್ ಬೇಕಿಲ್ಲ....!
ನೀರಿನ ಸಂಸ್ಕರಣೆಗೆ ಯಾವುದೇ ದುಬಾರಿ ನೀರು ಶುದ್ಧೀಕರಣದ ಅಗತ್ಯವಿಲ್ಲ. ಸಂಪೂರ್ಣ ಕವರ್ ಮಾಡಿರುವ ಒಂದು ಪ್ಲಾಸ್ಟಿಕ್ ಅಥವಾ ಸ್ಟೀಲ್ ಪಾತ್ರೆಯ ತಳಭಾಗದಲ್ಲಿ ಅಥವಾ ಅದರ ಸುತ್ತಲೂ ಶುದ್ಧ ಬೆಳ್ಳಿಯ ತೆಳ್ಳನೆಯ ಶೀಟ್ ಇಟ್ಟು ನೀರು ಹಾಕಿ. ಹತ್ತು ಗಂಟೆ ಕಾಲ ನೀರಿಗೆ ಬೆಳಕೇ ಸೋಕಬಾರದು, ಹಾಗೆ ಕಾಯ್ದಿಡಿ. ಬಳಿಕ ಅದನ್ನು ತೆಗೆದು ನಿಮಗೆ ಬೇಕಾದ ಪಾತ್ರೆಯಲ್ಲಿ ಹಾಕಿಟ್ಟುಕೊಳ್ಳಿ. ಝೀರೋ ಬ್ಯಾಕ್ಟೀರಿಯಾದ ಇಂತಹ ನೀರಿನ ರುಚಿಗೆ ನೀವೇ ಬೆರಗಾಗುತ್ತೀರಿ. ಇದರ ಸೂತ್ರ ಇಷ್ಟೇ; ಸಿಲ್ವರ್​ನಲ್ಲಿ ಬ್ಯಾಕ್ಟೀರಿಯಾವನ್ನು ಕೊಲ್ಲುವ ಅಯಾನ್ ಅಂಶವಿರುತ್ತದೆ. ನೀರಿನಲ್ಲಿರುವ ಬ್ಯಾಕ್ಟೀರಿಯಾ ಅಯಾನ್ ಸಂಪರ್ಕದಿಂದ ನಾಶವಾಗುತ್ತವೆ. ನೀರಿನಲ್ಲಿ ಸಿಲ್ವರ್ ಕರಗುವುದಿಲ್ಲ. ಅಂದರೆ ಕುಡಿಯುವ ನೀರಿನಲ್ಲಿ ಬೆಳ್ಳಿಯಂಶ ಸೇರಿಕೊಳ್ಳುವುದಿಲ್ಲ. ಬೆಳ್ಳಿ ಮಾತ್ರ ಶುದ್ಧವಾಗಿರಬೇಕು, ಅದಕ್ಕೆ ಬೇರಿನ್ನಾವುದೂ ಮಿಶ್ರವಾಗಬಾರದು. ಹತ್ತು ಲೀ. ನೀರಿಗೆ ಎ-4 ಅಳತೆಯ ಬೆಳ್ಳಿ ತಗಡು ಬೇಕಾಗುತ್ತದೆ. 3-4 ದಿನಗಳಿಗೊಮ್ಮೆ ಸ್ವಚ್ಛಗೊಳಿಸಬೇಕು. ಕ್ಲೀನ್ ಮಾಡಿದ ತಕ್ಷಣ ನೀರಿರುವ ಪಾತ್ರೆಯೊಳಗೆ ಹಾಕದಿದ್ದರೆ ಅದು ಸಿಲ್ವರ್ ಆಕ್ಷೈಡ್ ಆಗುತ್ತದೆ. ಹಾಗೆ ಇಟ್ಟ ಸಿಲ್ವರ್ ಶೀಟ್ ಬ್ಯಾಕ್ಟೀರಿಯಾವನ್ನು ಸಾಯಿಸದು. ಶಿವಕುಮಾರ್ ಮನೆಯಲ್ಲಿ ಅಡುಗೆಗೆ, ಕುಡಿಯಲು ಇದೇ ನೀರಿನ ಬಳಕೆ.
***

  
ಫ್ರಿಡ್ಜ್ ನ್ನು ಹೀಗೆ ತೆಗೀರಿ....



ಫ್ರಿಡ್ಜ್ ಉಳಿಸುತ್ತದೆ ಇಂಧನ!
ಶಿವಕುಮಾರ್ ಅವರ ಮನೆಯಲ್ಲಿರುವ ಫ್ರಿಡ್ಜ್ ಕತೆ ಕೇಳಿ; ನಿಮ್ಮ ಮನೆಯಲ್ಲಿ ಇರುವ ಫ್ರಿಡ್ಜ್ ಬಾಗಿಲನ್ನು ಹೇಗೆ ತೆಗೆಯುತ್ತೀರಿ? ಎಡಭಾಗದಿಂದ ತಾನೆ? ಹಾಗೆ ಮಾಡುವುದು ತಾಂತ್ರಿಕವಾಗಿ ಸರಿಯಲ್ಲ. ಅದರಿಂದ ಹೆಚ್ಚು ವಿದ್ಯುತ್  ಖರ್ಚಾಗುತ್ತದೆ. ಎಡಭಾಗದ ಫ್ರಿಡ್ಜ್ ಬಾಗಿಲು ಎಳೆದ ತಕ್ಷಣ ಅದು ನಿಮ್ಮ ಬಲಗೈ ಬರುತ್ತದೆ. ಒಳಗಿದ್ದ ವಸ್ತುಗಳನ್ನು ತೆಗೆಯಲು ಎಡಗೈ ಬಳಸುತ್ತೀರಿ. ಅದು ನಿಜಕ್ಕೂ ಅನನುಕೂಲವಲ್ಲವಾ ಎಂದು ನೀವೆಂದಾದರೂ ಯೋಚಿಸಿದ್ದೀರಾ? ಇಲ್ಲ. ಕೊಟ್ಟಿದ್ದನ್ನು ಬಳಸಿಕೊಂಡು ಹೋಗುವ ಜಾಯಮಾನ ನಮ್ಮದು.
ಆದರೆ ಶಿವಕುಮಾರ್ ಅವರ ಮನೆಯ ಫ್ರಿಡ್ಜ್ ಬಲಭಾಗದಿಂದ ತೆರೆಯುವ ವ್ಯವಸ್ಥೆಯನ್ನು ಇವರೇ ಮಾಡಿಕೊಂಡಿದ್ದಾರೆ. ಅದು ಎಲ್ಲಕ್ಕೂ ಅನುಕೂಲ ಮತ್ತು ವಿದ್ಯುತ್ ಬಳಕೆ ಶೇ.28ರಷ್ಟು ಕಡಿಮೆಯಾಗುತ್ತದೆ.

ನಿಡುಸುಯ್ದ ಭೂತಾಯಿ
ಬೆಂಗಳೂರಿನಲ್ಲಿ ತಾನು ಖರೀದಿಸಿದ 3500 ಅಡಿ ವಿಸ್ತೀರ್ಣದ ಜಾಗದಲ್ಲಿ ಕಟ್ಟಡ ಕಟ್ಟಲು ಶುರು ಮಾಡಿದ ವ್ಯಕ್ತಿಯೊಬ್ಬ ಬೋರ್​ವೆಲ್ ಕೊರೆಸುತ್ತಾನೆ. 850 ಅಡಿ ಆಳಕ್ಕೆ ಹೋದರೂ ಒಂದು ಹನಿ ನೀರಿಲ್ಲ. ಅಂತಹ ಸಂದರ್ಭದಲ್ಲಿ ಆತ ಮಾಡಿದ ಕೆಲಸವೇನು ಗೊತ್ತೆ? 850 ಅಡಿ ಆಳಕ್ಕೆ ಡೈನಮೇಟ್ ಇಟ್ಟು ಸ್ಪೋಟಿಸಿದ್ದು. ಭೂಮಿಯ ಮೇಲ್ಭಾಗದಲ್ಲಿರುವ ಕೊಳವೆಯಲ್ಲಿ ಸಣ್ಣಗೆ ಹೊಗೆ ಬಂದು ಭೂತಾಯಿ ನಿಡುಸುಯ್ಯುತ್ತಾಳೆ. ಕೊನೆಗೂ ಆತನ ಹಠ ಗೆದ್ದಿತಂತೆನೀರು ಸಿಕ್ಕಿತಂತೆ. ಆದರೆ ಭೂತಾಯಿಯ ಗರ್ಭಕ್ಕೇ ಆದ ಹಾನಿಗೆ ಬೆಲೆ ಕಟ್ಟುವವರು ಯಾರುನಮ್ಮ ಸುತ್ತ ಇರುವ ಅಂತಹ ದುರುಳರಿಗೆ ಸಜ್ಜನ ವಿಜ್ಞಾನಿ ಶಿವಕುಮಾರ್ ಎಲ್ಲಿ ಅರ್ಥವಾಗುತ್ತಾರೆ
ನಮ್ಮ ನಡುವಿನ ಸಜ್ಜನ ಶಿವಕುಮಾರ್ ಅವರಿಗೆ ಒಂದು ಸಲಾಂ ಹೇಳೋಣ ಬನ್ನಿ.